14,304 total views
Isang panibagong malawakang kilusan ang nakatakdang ilunsad na naglalayong ipasa ang isang tunay na batas laban sa political dynasty sa bansa.
Nakatakda ang media launch ng Dapat Isa Lang o D1L Movement sa Mayo 8, 2026 mula alas-10 ng umaga hanggang alas-12 ng tanghali sa Obispado de Cubao.
Layunin ng kilusan na itulak ang pagpapatibay ng isang “genuine anti-political dynasty law” sa pamamagitan ng People’s Initiative, na isang paraang nagbibigay-daan sa mamamayan na direktang makapagpanukala ng batas.
Ayon sa grupo, ilalahad sa pagtitipon ang kanilang mga plano, katuwang na organisasyon, at kampanya upang makalikom ng suporta para sa panukala.
Binigyang-diin ng kilusan na layunin nitong tugunan ang matagal nang panawagan para sa reporma at pananagutan sa pamahalaan.
Dagdag pa ng Dapat Isa Lang o D1L Movement, layunin nitong tiyakin ang pantay na pagkakataon ng bawat mamamayan na makapagsilbi sa pamahalaan.
“D1L champions the passage of a long overdue law prohibiting political dynasties and guaranteeing equal access to opportunities for public service by providing the definition of political dynasties together with clear enforcement procedures. D1L will pass the people’s version of the law via People’s Initiative, which is a Constitutionally vested power to pass a law directly instead of going through Congress.” Bahagi ng mensahe ng D1L Movement.
Isasapubliko rin sa gawain ang manifesto na pirmado ng iba’t ibang sektor kabilang ang civil society, business, educational at faith-based groups.
Kabilang sa mga inaasahang dadalo ang ilang kilalang personalidad tulad nina D1L Spokesperson Atty. Carlo Africa; Former Supreme Court Associate Justice Antonio Carpio; Former Commission on Elections Commissioner Luie Guia; Kontra Dinastiya founder Atty. Alex Lacson; Peoples Initiative Coalition Against Dynasties Petitioner Atty. Eirene Aguila; Clergy for Good Governance Convenor Fr. Robert Reyes; at Simbahang Lingkod ng Bayan Executive Director Mr. Karlo Abadines.
