817 total views
Nanawagan ang Philippine Misereor Partnership Inc. ng pananagutan at mas mahigpit na pagtugon kasunod ng naganap na sunog sa Navotas Sanitary Landfill.
Ayon sa PMPI, sumasalamin ang insidente sa matagal nang kakulangan sa maayos na pamamahala at mahinang pagpapatupad ng mga polisiya sa operasyon ng landfill.
Ikinabahala ng grupo ang makapal at nakalalasong usok na umabot sa iba’t ibang bahagi ng Metro Manila, na nagdulot ng panganib sa kalusugan ng mga komunidad at maging ng mga biyaherong dumaraan sa pangunahing lansangan.
“Commuters have reported dense, pungent air along major corridors such as the Skyway toward Pasay, while local governments have issued warnings that air quality has reached very unhealthy to emergency levels,” pahayag ng PMPI.
Iginiit ng PMPI na ang patuloy na pagbuga ng mapanganib na emisyon mula sa landfill ay hindi lamang usaping teknikal, kundi paglabag sa karapatan ng mamamayan sa isang malinis, ligtas, at balanseng kapaligiran.
Binigyang-diin din ng organisasyon na ipinapakita ng insidente ang mga suliraning nais tugunan ng panukalang Ecocide Prevention Act, kabilang ang hindi agarang pagtugon sa mga panganib, mahinang pagpapatupad ng batas, pagpapabaya sa mga umiiral na banta, at paglalagay sa mga komunidad sa panganib ng nakalalasong polusyon.
“Accountability must therefore extend beyond landfill operators to the institutions that permit these dangerous conditions to exist. The public deserves protection and assurance that environmental hazards are neither minimized nor normalized,” ayon sa PMPI.
Dahil dito, nanawagan ang PMPI ng isang malinaw at bukas na imbestigasyon, agarang proteksyon para sa mga apektadong residente, at kabuuang pagrepaso sa pamamahala ng landfill at mga emergency system sa bansa.
Nanindigan ang grupo na hindi dapat maging normal ang ganitong mga insidente dahil bawat pagwawalang-bahala sa pinsalang pangkalikasan ay naglalagay sa buhay, kalusugan, at kinabukasan ng mga komunidad sa mas malaking panganib.
