5,701 total reads
Nagkasundo ang Climate Change Commission (CCC) at Komisyon sa Wikang Filipino (KWF) na palawakin ang paggamit ng Filipino at iba’t ibang katutubong wika sa pagpapalaganap ng impormasyon hinggil sa climate change.
Nilagdaan ng dalawang ahensya ang isang Memorandum of Understanding (MOU) upang gawing mas malinaw, mas madaling maunawaan, at mas abot ng mga komunidad ang usapin ng krisis sa klima.
Ayon kay CCC Vice Chairperson at Executive Director Robert E.A. Borje, mahalagang katuwang ng komisyon ang KWF sa pagsusulong ng mga hakbang at pagpapalawak ng kaalaman hinggil sa pagbabago ng klima at pangangalaga ng kalikasan.
Binigyang-diin ni Borje na bagamat unibersal ang datos at siyensya ng climate change, kinakailangang maipaliwanag ito sa paraang lokal, inklusibo, at nauunawaan ng mga mamamayan mula sa iba’t ibang sektor ng lipunan.
“Ang ganitong teknikal na dokumento ay nangangailangan ng koordinasyon sa inyong institusyon upang masiguro na napapanatili nito ang linguistic inclusivity. Dito nagtatagpo ang dalawang tungkulin: ang CCC sa pagbibigay-linaw sa panganib at direksyon ng patakaran, at ang KWF sa pagtiyak na ito ay nauunawaan at nagiging bahagi ng buhay ng bawat Pilipino,” pahayag ni Borje.
Sinabi naman ni KWF Chairperson Atty. Marites A. Barrios-Taran na mahalagang magamit ang wika bilang instrumento upang maihatid sa mamamayan ang mahahalagang impormasyon, kabilang ang usapin ng kalikasan at pagbabago ng klima.
“Ang ating wika ay dapat na nagsisilbi sa tao. Ang Komisyon sa Wikang Filipino ay itinatag hindi lamang upang maging bantay ng balarila o tagasuri ng mga salita; ang ating serbisyo ay kailangang nakararating sa mga mamamayan,” ayon kay Barrios-Taran.
Kabilang sa pagtutulungan ng CCC at KWF ang pagbuo ng communication materials, capacity-building activities, at mga kampanyang gumagamit ng siyentipikong datos na maisasalin sa pambansa at rehiyonal na mga wika.
Bahagi rin ito ng whole-of-government approach ng pamahalaan upang mapalakas ang kahandaan at katatagan ng bansa laban sa lumalalang epekto ng climate change.
Kaakibat naman ito ng mensahe ni Pope Francis sa Laudato Si’ at Laudate Deum na mahalagang maipaabot sa bawat pamayanan ang usapin ng climate change upang sama-samang mapangalagaan ang kalikasan at kinabukasan ng susunod na henerasyon.
