248 total views
Sinuportahan ni House Committee on Higher and Technical Education Chair Jude Acidre ang paninindigan ni Kidapawan Bishop Jose Colin Bagaforo na ang impeachment proceedings laban kay Vice President Sara Duterte ay hindi dapat ituring na pamumulitika o pang-uusig, kundi isang lehitimong proseso ng Konstitusyon at bahagi ng demokratikong mekanismo ng bansa.
“Tama po si Bishop Bagaforo. In a democracy, transparency is not a weakness. Accountability is not political harassment. Justice is not destabilization. Ang impeachment process po actually ay proseso ng paghilom, proseso ng paghanap ng sagot, ng liwanag,” ayon kay Acidre.
Sa gitna ng nakatakdang botohan sa Kamara para sa pagpapadala sa Senado ng Articles of Impeachment, iginiit ni Acidre na ang impeachment ay hindi banta sa pagpapahina ng gobyerno, kundi isang paraan upang linawin ang mga usapin ng pananagutan at maibalik ang tiwala ng publiko sa mga institusyon.
Binigyang-diin niya na ang proseso ay maaaring magsilbing hakbang tungo sa “paghilom” ng bansa sa gitna ng lumalalim na duda at pagkakahati-hati sa politika, lalo na sa mga alegasyon ng umano’y maling paggamit ng mahigit 612 milyong pisong confidential funds sa ilalim ng Office of the Vice President at Department of Education.
Kabilang sa mga isyung tinatalakay ang mabilis na disbursement ng pondo, mga kaduda-dudang liquidation reports, findings ng Commission on Audit, at mga ulat ng National Bureau of Investigation na may kaugnayan sa mga dokumento at acknowledgment receipts.s
Ayon kay Acidre, ang patuloy na hindi pagharap sa mga pagdinig at hindi direktang pagsagot sa mga akusasyon ay lalong nagpapalalim ng pagdududa ng publiko, sa halip na makapagbigay-linaw.
Lumawak pa ang saklaw ng mga paratang sa Article II ng impeachment, kabilang ang sinasabing hindi maipaliwanag na pagtaas ng yaman ng Bise Presidente mula 2007 hanggang 2024, gayundin ang malalaking transaksyong iniulat ng Anti-Money Laundering Council na may kinalaman sa pamilya Duterte.
Dagdag pa rito ang Article III na tumutukoy sa alegasyon ng bribery at distribusyon ng cash envelopes sa ilang opisyal ng Department of Education, at Article IV na may kaugnayan sa grave threats at pagbabanta sa buhay laban sa matataas na opisyal ng pamahalaan.
“Only the evil fear the cleansing power of valid and thorough investigations and trials,” saad pa ng mambabatas.s
Iginiit ni Acidre, ang mga kasong ito ay hindi dapat takasan o balewalain, kundi harapin sa tamang proseso ng batas kung saan ebidensya at katotohanan ang mananaig.
