8,764 total reads
Nagpahayag ng pagkabahala ang Legal Rights and Natural Resources Center matapos simulan ng Green Arrow Agriventures, Inc. (GAAVI), subsidiary ng Kennemer Foods International, ang pagtatayo ng perimeter fence sa loob ng lupaing ninuno ng tribung Kirinteken-Ilentungen Menuvu sa Don Carlos, Bukidnon.
Ayon sa grupo, noong May 15, 2026, nagsimulang maghukay ng mga poste ang mga tauhan ng kumpanya, kabilang ang mga armadong guwardiya, sa loob ng 195-ektaryang banana plantation na sinasabing sumasaklaw sa ancestral domain ng tribu.
“The tribe will soon have no way in and out of their village because of the barriers,” pahayag ng LRC.
Ang nasabing lupain ay kasalukuyang saklaw ng Agrarian Law Implementation (ALI) case dahil sa pagsasalungatan ng mga titulong inilalakad sa ilalim ng Support to Parcelization of Lands for Individual Titling (SPLIT) Project at ng Certificate of Ancestral Domain Title (CADT) ng tribu.
Ibinahagi ng LRC na noong April 27, 2026, nagsagawa ng dayalogo ang Serukadang Manobo Tribal Organization (SMTO), kasama ang Department of Agrarian Reform (DAR), Department of Environment and Natural Resources (DENR), National Commission on Indigenous Peoples, at World Bank, kung saan pansamantalang isinuspinde ang implementasyon ng proyekto.
Gayunman, iginiit ng GAAVI-Kennemer na wala pa itong natatanggap na opisyal na memorandum mula sa DAR kaya nananatili ang kanilang operasyon sa lugar.
Binigyang-diin ng LRC na ang pagtatayo ng bakod ay maaaring lalo pang maglimita sa access ng tribu sa kanilang mga sakahan, sagradong lugar, at natitirang bahagi ng kanilang lupaing ninuno.
“The project has also been criticized for encouraging indebtedness, where struggling farmer-beneficiaries can more easily sell their individual land parcels, ultimately reversing agrarian reform and exacerbating landlessness,” ayon sa LRC.
Nakasaad sa Laudato Si’ na ang pagtatanggol sa mga katutubo at sa kalikasan ay bahagi ng paggalang sa dignidad ng tao at pangangalaga sa nag-iisang tahanan.
