257 total views
Nagpahayag ng pagkabahala si Cubao Bishop Elias Ayuban Jr., CMF at nanawagan ng patas na pagtingin sa usapin ng katarungan kasunod ng naging reaksyon ni Senator Pia Cayetano sa privilege speech ni Sen. Risa Hontiveros hinggil sa nangyaring gulo sa Senado noong May 13.
Sa kanyang bukas na liham, ipinunto ni Bishop Ayuban ang pagiging mapili sa pagpapakita ng pagkabahala at pagpapahalaga sa buhay, kasunod ng insidente sa Senado, na inihambing niya sa sinapit ng mga biktima ng madugong kampanya laban sa droga noong mga nakaraang taon.
“Noong gabi-gabing may duguang bangkay na nakahandusay sa tabi ng estero… kinakamusta mo rin ba at ng 12 mong kasama ang naulilang pamilya?” pahayag ni Bishop Ayuban.
Binanggit din ni Bishop Ayuban si Kian delos Santos at iba pang biktima ng karahasan na aniya’y hindi nabigyan ng sapat na pagkilala at katarungan.
Ayon sa obispo, madaling malimot ang sinapit ng mahihirap lalo na kung wala silang kapangyarihan o impluwensya sa lipunan, kaya’t iginiit niya na hindi dapat namimili ang katarungan at habag batay sa katayuan ng isang tao.
“Ang hustisya ba’y may paboritong adres? Ang habag ba’y marunong pumili kung sino lamang ang dapat luklukan ng awa? Mas mabigat ba ang luha kapag ang umiiyak ay may posisyon, at mas magaan kapag ang bangkay ay mula sa laylayan?,” saad ni Bishop Ayuban.
Binigyang-diin din ng obispo na nananatiling sariwa sa alaala ng sambayanan ang sinapit ng libu-libong biktima ng karahasan at hindi ito dapat matabunan ng mga talumpati at usaping pulitikal.
Hinimok ni Bishop Ayuban ang mga halal na opisyal na isulong ang tunay na paghilom at pagbabago sa lipunan, lalo na para sa mga pamilyang matagal nang naghahanap ng katarungan at kapayapaan.
“Kaya bago mo muling itanong kung nasaan ang iyong mga kasama, baka dapat mong lingunin ang mga gabing tahimik kang nakatingin habang ang mahihirap ay isa-isang nililibing,” ayon kay Bishop Ayuban.
