5,191 total reads
Kinilala ng Federation of Free Workers o FFW ang bagong encyclical ni Pope Leo XIV na Magnifica Humanitas.
Isinusulong ng Magnifica Humanitas ang responsableng paggamit ng Artificial Intelligence o AI para sa kabutihang panlahat at pangangalaga sa dignidad ng tao.
Nagpapasalamat ang FFW sa Santo Papa sa encyclical na mahalagang paalala sa mabilis na paglago ng digital economy at paggamit ng AI sa mga lugar ng trabaho.
Iginiit ni Ateneo de Davao Grade School Faculty Union President Arlene Golloso-Degayo at board member ng FFW na dapat magsilbi ang teknolohiya sa tao at hindi gawing “kasangkapan” o disposable data ang mga manggagawa.
“From factory machines during the Industrial Revolution to today’s ‘thinking machines,’ the Church reminds the world of one timeless principle: technology must serve the human person — not reduce the human person into a tool or disposable data,” ayon sa mensahe ni Degayo na pinadala ng FFW sa Radyo Veritas.
Ibinahagi naman ni FFW President Sonny Matula na maraming manggagawa ang nananatiling walang job security, living wage, social protection, at maayos na collective bargaining agreement sa kabila ng paglawak ng digital platforms.
Dahil dito, hinikayat ng grupo ang mga manggagawa sa digital economy na bumuo ng mga unyon, asosasyon, at workers’ collectives upang mas mapakinggan ang kanilang mga hinaing.
Binigyang-diin din ng FFW na habang tinatanggap nila ang pagbabago at pagtaas ng produktibidad, kinakailangan pa ring pairalin ang karapatang pantao, social justice, living wage, at pakikiisa ng mga manggagawa sa paghubog ng kinabukasan ng trabaho.
“The Holy Father’s message is clear: workers, the poor, and those in the peripheries of society must not be left behind by technological progress. They must be brought to the center of economic and political decision-making,”” ayon naman sa mensahe ni Atty.Matula na pinadala ng FFW sa Radyo Veritas.
Inihalintulad ng grupo ang Magnifica Humanitas sa Rerum Novarum ni Pope Leo XIII na tumugon noon sa hamon ng Industrial Revolution, habang ang bagong encyclical naman ay nakatuon sa mga hamon ng digital age at AI-driven economy.
