5,609 total reads
Nanawagan ang REnew Mindoro sa pamahalaang panlalawigan ng Oriental Mindoro na bumuo ng pangmatagalang renewable energy roadmap kasabay ng pagtugon sa lumalalang krisis sa enerhiya sa lalawigan.
Ang REnew Mindoro ay isang renewable energy campaign na suportado ng Simbahan na pinangungunahan ng Diocese of Calapan Social Action Center at ng Center for Energy, Ecology, and Development (CEED).
Suportado ng grupo ang hakbang ni Oriental Mindoro Governor Humerlito “Bonz” Dolor na tipunin ang mga pangunahing energy stakeholders upang tugunan ang patuloy na rotational brownouts sa lalawigan.
Ayon kay REnew Mindoro lead convener at Calapan DSAC Director, Fr. Edwin Gariguez, mahalaga ang agarang pagtugon ngunit kinakailangan ding maglatag ng pangmatagalang solusyon na nakatuon sa renewable energy.
“The steps outlined, like reviewing contracts, coordinating fuel supply, and calling for conservation, are necessary, and we fully support them. We now ask that the provincial government take the next and more lasting step: a concrete renewable energy roadmap for Oriental Mindoro,” pahayag ni Fr. Gariguez.
Nauna nang inamin ng provincial government na maaaring magpatuloy hanggang Mayo at Hunyo ang rotational brownouts bunsod ng kakulangan sa suplay ng kuryente at pagdepende sa mamahaling emergency power supply agreements.
Sa isinagawang emergency dialogue noong May 18, 2026, iniulat ng Oriental Mindoro Electric Cooperative (ORMECO) na nasa 56.5 megawatts lamang ang dependable power supply kumpara sa mahigit 75 megawatts na peak demand na naitala noong May 11.
Iginiit ng REnew Mindoro na ipinapakita ng krisis ang kahinaan ng labis na pagdepende sa hydroelectric power nang walang pinagsamang renewable energy sources tulad ng solar, wind, at hydro power.
“When a province depends heavily on hydro alone, a dry season becomes a crisis,” ayon sa grupo.
Ibinahagi rin ng REnew Mindoro na lumalakas ang suporta ng mga pamayanan sa renewable energy matapos lumagda ang pitong parokya ng Diocese of Calapan sa solar energy contracts na may kabuuang 200 kilowatt-peak sa isinagawang REnew Mindoro Investment Summit noong April 30.
Patunay ito, ayon kay Fr. Gariguez, na handa ang mga parokya, kooperatiba, mangingisda, magsasaka, at mga katutubong komunidad na itaguyod ang malinis at sustenableng enerhiya bilang pangmatagalang solusyon sa krisis sa kuryente.
