1,119 total views
Kinilala at tinanggap ng Kalikasan People’s Network for the Environment (Kalikasan PNE) ang pansamantalang pagpapahinto at pagsusuri sa tree-cutting operations sa kahabaan ng Quirino Avenue sa Maynila para sa Southern Access Link Expressway (SALEX) project na kaugnay ng San Miguel Corporation (SMC), kasunod ng malawakang protesta ng mga mamamayan at makakalikasang grupo.
Ayon kay Kalikasan PNE national coordinator Cathleen de Guzman, ang desisyon ay bunga ng sama-samang pagkilos at patuloy na pagbabantay ng mga komunidad, environmental defenders, at iba’t ibang laban sa patuloy na pagputol ng mga puno sa Metro Manila.
“Malinaw na bunga ito ng sama-samang pagkilos at pagbabantay ng mamamayan. Kung hindi nag-ingay at nagprotesta ang mga komunidad at organisasyon, tuloy-tuloy lamang ang pagputol ng mga puno,” pahayag ni de Guzman.
Gayunman, iginiit ng grupo na nagbubukas ito ng mas malalim na usapin ng pananagutan at pamamahala sa kalikasan.
Binatikos din ng Kalikasan PNE ang Department of Environment and Natural Resources (DENR) sa pagpapahintulot sa proyekto sa kabila ng malawak at hindi na mababawing epekto nito sa kalikasan.
“Dapat managot at patuloy na singilin ang DENR. Hindi dapat nagsisilbing rubber stamp ang ahensya para sa mga proyektong pinapaboran ang malalaking korporasyon kapalit ng kalikasan at kapakanan ng mamamayan,” giit ni de Guzman.
Iginiit din ng grupo ang pananagutan ng mga ahensiya ng pamahalaan at pinuna ang mga malalaking proyektong imprastraktura sa ilalim ng administrasyon ni Pangulong Ferdinand Marcos Jr. na nakapipinsala sa kalikasan.
Binigyang-diin ng Kalikasan PNE na hindi dapat tumigil sa suspensyon ang usapin, lalo’t mahigit 200 puno na ang nawala dahil sa proyekto.
Inihayag din ng grupo na magsasampa sila ng kaso laban sa mga responsable sa mapaminsalang pagputol ng mga puno at sa kabiguan sa pamamahala sa kalikasan.
Sa huli, iginiit ng Kalikasan PNE na ang pangyayari ay patunay ng lakas ng kolektibong pagkilos ngunit nagpapakita rin ng sistemikong suliranin sa pangangalaga sa kalikasan sa bansa.
“Ang laban para sa kalikasan ay hindi natatapos sa isang suspensyon. Patuloy nating ipaglalaban ang tunay na pananagutan at makakalikasang kaunlaran para sa mamamayan,” saad ni de Guzman.
Binigyang-diin sa Laudato Si’ ni Pope Francis na ang pangangalaga sa kalikasan ay moral na tungkulin na kaakibat ng katarungan, pananagutan, at pangangalaga sa nag-iisang tahanan.
