8,935 total views
Inilaan ng Kanyang Kabanalan Pope Leo XIV ang kaniyang prayer intention para sa buwan ng Hunyo 2026 para sa pagsusulong ng mga pagpapahalagang hatid ng sports o palakasan bilang daan ng kapayapaan, pagkakaisa, at paghubog ng mabuting pakikipagkapwa.
Partikular na hinimok ng Santo Papa ang mga mananampalataya na ipanalangin na maging instrumento ang sports o palakasan ng pagtatagpo at dayalogo ng iba’t ibang kultura at bansa sa gitna ng mga pagkakaiba at hamon ng makabagong panahon.
Binigyang-diin ng Santo Papa na higit pa sa kompetisyon at tagumpay ang tunay na diwa ng sports sapagkat ito ay maaaring magsilbing paraan upang mapalalim ang respeto, pagkakaisa, disiplina, at malasakit sa kapwa.
Ayon kay Pope Leo XIV, sa pamamagitan ng sports ay nahuhubog ang pagpapahalaga sa pagtutulungan, patas na pakikitungo, at paggalang sa dignidad ng bawat tao anuman ang kultura, lahi, o pinagmulan.
“Let us pray that sports be an instrument of peace, encounter, and dialogue among cultures and nations, and that they promote values such as respect, solidarity, and personal growth.” panalangin ni Pope Leo XIV para sa buwan ng Hunyo.
Una ng inihayag ng Santo Papa na mahalaga ang papel ng sports sa paghubog ng mga kabataan hindi lamang sa aspetong pisikal kundi maging sa kanilang pagkatao at pakikisalamuha sa komunidad.
Kasabay nito, nanawagan si Pope Leo XIV sa iba’t ibang bansa at pamayanan na gamitin ang sports bilang tulay ng pagkakaunawaan at kapayapaan lalo na sa panahong maraming lipunan ang nahaharap sa hidwaan, diskriminasyon, at pagkakahati-hati.
