8,097 total reads
Kinumpirma ng National Shrine and Parish of Saint Padre Pio sa Sto. Tomas, Batangas, na pinagkalooban ng Vatican ng dekreto para sa pag-angat ng dambana bilang isang international shrine.
Ayon sa pamunuan ng dambana, inilabas ang dekreto noong May 25, 2026 sa tanggapan ng Dicastery for Evangelization sa Vatican City, kasabay ng ika-139 na anibersaryo ng kapanganakan ni San Padre Pio.
“The National Shrine and Parish of St Padre Pio has received the decree from the Holy See granting its elevation to an INTERNATIONAL SHRINE,” ayon sa pahayag ng dambana.
Kasunod nito, inaanyayahan ng dambana ang mga mananampalataya na makiisa sa mga paghahanda at patuloy na manalangin para sa opisyal na deklarasyon ng international shrine sa Setyembre 23, kapistahan ni San Padre Pio.
“As we joyfully receive this blessing, let us continue to pray and prepare for the solemn declaration of our International Shrine on September 23, the Feast Day of St. Padre Pio,” ayon pa sa pahayag.
Umaasa rin ang dambana na magsisilbing inspirasyon ang pagkilalang ipinagkaloob ng Vatican upang higit pang mapalalim ang pananampalataya at debosyon ng mga mananampalataya.
Matatandaang matagal nang isinusulong ng Arkidiyosesis ng Lipa ang pagkilala sa dambana bilang pandaigdigang dambana.
Kabilang sa mga tampok sa aklat ng Arkidiyosesis ng Lipa na inilunsad noong January 13, 2024, na may pamagat na “Enlarging the Space of our Tent,” ang kahilingang maitaas sa antas ng international shrine ang dambana ni San Padre Pio dahil sa patuloy na pagdagsa ng mga deboto mula sa iba’t ibang bahagi ng mundo.
Itinatag ang dambana noong 2003, idineklara bilang archdiocesan shrine noong 2008, at itinaas bilang national shrine noong 2015, bago ngayon pinagkalooban ng Vatican ng dekreto para sa pagiging international shrine.
Ang National Shrine and Parish of Saint Padre Pio ang kauna-unahang dambana sa Pilipinas na itinalaga kay San Padre Pio, isa sa mga pinakatanyag na banal ng Simbahang Katolika na kilala sa kanyang malalim na buhay-pananalangin at pagmamahal sa Sakramento ng Kumpisal.
Ito na ang magiging ikalawang international shrine sa Pilipinas kasunod ng International Shrine of Our Lady of Peace and Good Voyage o Antipolo Cathedral sa lalawigan ng Rizal.
