13,569 total reads
Hinimok ng Catholic Bishops’ Conference of the Philippines (CBCP) ang mga obispo at tagapangasiwa ng mga diyosesis sa bansa na isama sa mga banal na misa sa Hunyo 19 ang natatanging panalangin para sa mga Pilipinong social worker bilang pakikiisa sa pagdiriwang ng Filipino Social Workers’ Day.
Sa liham sirkular, sinabi ni CBCP President, Lipa Archbishop Gilbert Garcera na ang hakbang ay tugon sa panibagong kahilingan ng mga miyembro ng propesyon ng social work at pagpapatuloy ng naging positibong pagtanggap sa kaparehong inisyatiba sa mga nagdaang taon.
Ayon kay Archbishop Garcera, mahalagang maipadama ng Simbahan ang espirituwal na pakikiisa sa mga social worker na tahimik na naglilingkod sa mga pinakamahihirap at higit na nangangailangan sa lipunan.
“These men and women labor in challenging contexts — accompanying children in need of care and protection, assisting families in crisis, supporting women in difficult situations, and responding to communities affected by poverty and disaster,” pahayag ni Archbishop Garcera.
Binigyang-diin din ng arsobispo na ang kanilang paglilingkod ay sumasalamin sa mga pagpapahalagang itinataguyod ng Ebanghelyo tulad ng habag, katarungan, at pagtatanggol sa dignidad ng bawat tao.
Dahil dito, hinikayat niya ang mga obispo na mag-alay o magpatupad ng banal na misa sa Hunyo 19 para sa lahat ng mga Pilipinong social worker at, kung maaari, ay maiparating din ang nasabing intensyon sa mga parokya at relihiyosong komunidad sa kanilang nasasakupan.
“Such a simple yet meaningful gesture of prayerful remembrance will surely be a source of encouragement and spiritual strength for those engaged in this demanding vocation of service, and a sign of the Church’s closeness to them,” dagdag ni Archbishop Garcera.
Idineklara ang Filipino Social Workers’ Day tuwing Hunyo 19 sa pamamagitan ng Presidential Proclamation No. 1176 bilang pagkilala sa mahalagang ambag ng mga social worker sa pagtataguyod ng kapakanan, dignidad, at karapatan ng mamamayan, lalo na ng mga mahihirap at mahihinang sektor ng lipunan.
