6,400 total reads
Nanawagan si Gumaca Bishop Euginius Cañete, MJ, ng sama-samang panalangin at tulong pinansyal para sa mga naapektuhan ng malakas na lindol sa Sarangani at iba pang bahagi ng Mindanao.
Sa kanyang Liham Sirkular, ipinabatid ng obispo ang pakikiisa ng Simbahan sa mga biktima ng kalamidad kasunod ng panawagan ng Catholic Bishops’ Conference of the Philippines (CBCP).
“Ipinahahayag ng Catholic Bishops’ Conference of the Philippines (CBCP) ang taos-pusong pakikiramay at pakikiisa sa ating mga kapatid na naapektuhan ng lindol na tumama sa Lalawigan ng Sarangani at iba pang bahagi ng Mindanao noong ika-8 ng Hunyo 2026,” bahagi ng liham sirkular ni Bishop Canete.
Bilang tugon sa pangangailangan ng mga nasalanta, inatasan ng obispo ang lahat ng parokya ng diyosesis na isama sa Panalangin ng Bayan sa mga Misa para sa Ika-11 Linggo sa Karaniwang Panahon ang natatanging panalangin para sa mga biktima ng lindol.
Kabilang sa panalangin ang kahilingang “aliwin ng Panginoon ang mga nagdadalamhati, pagalingin ang mga nasugatan, patatagin ang mga nakikibahagi sa pagsagip at pagtulong, at pabilisin ang pagbangon ng mga nasalantang pamayanan.”
Ipinag-utos din ni Bishop Cañete ang pagsasagawa ng “Second Collection” o espesyal na koleksyon sa mga Misa upang makalikom ng pondo na ipapadala sa mga apektadong lugar na nasasakop ng Diocese of Marbel para sa rehabilitasyon.
“Maglalaan ng ‘Second Collection’ (o special collection) upang maipagkaloob sa mga gawaing rehabilitasyon para sa mga nasalanta ng nasabing lindol,” ayon sa obispo.
Paliwanag ni Bishop Cañete na ang lahat ng malilikom na donasyon ay agad na ibibigay sa Social Action Center ng diyosesis upang matiyak ang maayos at wastong pamamahagi ng tulong sa mga lugar na lubhang naapektuhan ng kalamidad.
Hinimok naman ng obispo ang mga mananampalataya na tumugon sa panawagan ng pagkakawanggawa at pakikiisa sa mga nangangailangan.
“Nawa’y maging bukás ang ating puso sa panawagang ito ng pagdamay, at sa ating pagtutulungan ay maipadama natin ang habag at pag-ibig ng Diyos sa mga higit na nangangailangan,” pahayag ni Bishop Cañete.
Tiniyak ng obispo ang patuloy na panalangin para sa katatagan, paghilom, at pagbangon ng mga mamamayang apektado ng malakas na lindol, at ipinagkatiwala sa pamamatnubay ng Mahal na Birheng Maria ang bawat isa.
