6,250 total reads
Inanyayahan ni Kalibo Bishop Cyril Villareal ang mga mananampalataya na makibahagi sa pagdiriwang ng Golden Jubilee ng Diocese of Kalibo bilang pasasalamat sa Diyos sa limang dekadang paglilingkod ng lokal na Simbahan.
Sa mensahe ng obispo na ibinahagi ng diyosesis, hinimok nito ang mga mananampalataya na magbuklod para sa pangunahing pagdiriwang.
“The event we have long awaited will finally take place on July 15, 2026. We will celebrate the Golden Jubilee of our diocese. We are now 50 years old as the Diocese of Kalibo,” ayon kay Bishop Villareal.
Sinabi ng obispo na magsisimula ang pagdiriwang sa ganap na alas-9 ng umaga sa Cathedral Parish of St. John the Baptist kung saan pangungunahan ni Apostolic Nuncio to the Philippines, Archbishop Charles John Brown, ang banal na misa, habang magbabahagi ng pagninilay si Manila Archbishop Cardinal Jose Advincula.
Hinimok din ng obispo ang mga mananampalataya na makiisa sa pagdiriwang bilang pagpapahayag ng pasasalamat sa Diyos.
“Share in our joy. Share in our thanksgiving to God for guiding our local Church in Kalibo over the past 50 years,” ayon pa kay Bishop Villareal.
Ayon pa sa obispo, ang naturang pagdiriwang ay hudyat ng pagsisimula ng mga nakahanay na gawain upang ipagdiwang ang limang dekadang pagmimisyon ng lokal na simbahan sa Aklan.
“The celebration will not end on July 15. Rather, it will mark the beginning of the many activities we have lined up for the rest of the year,” aniya.
Dagdag pa ni Bishop Villareal, mahalaga ang pagbubuklod ng halos isang milyong mananampalataya ng diyosesis bilang pasasalamat sa Diyos sa patuloy na paggabay sa kristiyanong pamayanan sa lugar.
“Together we can express our joy and thanksgiving to God, who is the source of all blessings and the reason we have reached this milestone of 50 years as the local Church of Kalibo,” giit ni Bishop Villareal.
Naitatag ang diyosesis noong 1976, na noo’y bahagi ng Archdiocese of Capiz, kung saan unang naitalagang pastol si Bishop Juan Nilmar.
Bago si Bishop Villareal, nagsilbing pastol din ng diyosesis sina Bishop Gabriel Reyes, Bishop Jose Romeo Lazo, at Bishop Jose Corazon Tala-oc.
