7,955 total reads
Posibleng mas maagang matanggap ngayong taon ng mga kwalipikadong kawani ng pamahalaan ang kanilang Fiscal Year 2024 Performance-Based Bonus o PBB.
Ayon kay Palace Press Officer Claire Castro, inanunsyo ng Department of Budget and Management na kasalukuyan nang pinoproseso ang pagpapalabas ng PBB at inaasahang maipagkakaloob ito sa loob ng taon, mas maaga kumpara sa mga nakalipas na taon.
“Ito mismo ang salita mula sa DBM. Ang Fiscal Year 2024 Performance-Based Bonus para sa mga kwalipikadong kawani ng pamahalaan ay ipoproseso at inaasahang maipagkakaloob ngayong taon. Baka mas maaga pa, earlier,” ayon kay Castro.
Sinabi rin ni Castro na nakalaan na ang pondo para sa naturang benepisyo sa ilalim ng Fiscal Year 2026 General Appropriations Act, kaya nakatitiyak ang pamahalaan na may sapat na pondo para sa pagpapalabas nito.
Dagdag pa ng Malacañang, ang mas maagang pagproseso ng PBB ay alinsunod sa Executive Order No. 61 at sa Technical Working Group Memorandum Circular No. 2026-1, na nagtatakda ng schedule at mga alituntunin sa pagproseso at pagpapalabas ng bonus.
Pinayuhan naman ang mga kwalipikadong kawani ng gobyerno na sumangguni sa naturang memorandum circular para sa kumpletong detalye ng schedule at implementasyon ng Performance-Based Bonus.
