168 total views
Nanawagan si dating Integrated Bar of the Philippines (IBP) President, Atty. Domingo “Egon” Cayosa sa Korte Suprema na huwag makialam sa nagpapatuloy na impeachment trial sa Senado upang igalang ang malinaw na mandatong nasasaad sa Konstitusyon na ang Senado ang may eksklusibong kapangyarihang dinggin at litisin ang mga kasong impeachment.
Sa panayam sa programang Barangay Simbayanan ng Radyo Veritas, sinabi ni Atty. Cayosa na bagama’t karapatan ng sinuman ang magsampa ng petisyon sa Korte Suprema, hindi dapat maantala ang proseso ng impeachment na kasalukuyan ng umuusad at isinasagawa ng Senado.
“Sa tingin ko po hindi dapat patulan ng Supreme Court ‘yan. Sana hindi nila pakialaman ang trabaho ng Senado sapagkat malinaw naman sa ating Konstitusyon na pagdating sa impeachment, ang namamahala rito ay ang Senado,” Bahagi ng pahayag ni Atty. Cayosa sa Radyo Veritas.
Ayon pa sa dating pinuno ng IBP, tila malinaw ang layunin ng ilang petisyon na ihinto ang impeachment proceedings, bagay na aniya ay hindi na dapat maulit matapos batikusin ang naging pakikialam ng Korte Suprema sa mga naunang usapin kaugnay ng impeachment.
“Umuuusad na ang impeachment. Mas mahalaga na malaman nating lahat ang katotohanan at magpasya ang taumbayan at ang ating elected representatives kung sapat ba ang mga katotohanang ito para sa impeachment charges at para tanggalin ang isang mataas na opisyal ng gobyerno sa kanyang puwesto,” Dagdag pa ni Atty. Cayosa.
Sa pagtataya ni Atty. Cayosa sa unang tatlong araw ng paglilitis, sinabi nitong naging patas ang pagdinig at nabigyan ng sapat na pagkakataon ang magkabilang panig upang ihayag ang kanilang mga argumento.
“So far so good naman. Patas naman, nabigyan ng pagkakataon ang magkabilang panig. Ang mga abogado, parehong magaling both sides at kung may issue, nareresolba naman,” Ayon pa kay Atty. Cayosa
Gayunman, hinikayat niya ang mga Senador na limitahan ang labis na pagtutok sa mga teknikalidad upang higit na mapabilis ang paglilitis at maituon ang pagtalakay sa mas mahahalagang usapin ng kaso.
“Sana ay iwasan ang masyadong focus sa technicalities. Mas mako-control sana ng mga senador ang proseso para hindi malihis ang pag-uusisa sa mas importanteng katanungan,” Paliwanag ni Atty. Cayosa.
Binigyang-diin din ng abogado ang kahalagahan ng pagiging malinaw at madaling maunawaan ng impeachment proceedings upang masundan ito ng taumbayan at makabuo ng mga sariling pagpapasya.
“Importante po na simplehan ng mga senador at mga abogado ang proseso para naiintindihan ng taumbayan kasi tayo rin ang nasasaktan dito, tayo rin ang nagpapasya rito. It depends upon our moral and ethical level of tolerance for corruption, abuse, katiwalian, violence at kung ano-ano pa,” Ani Atty. Cayosa.
Kasabay nito, kinilala naman ng dating IBP president ang mahalagang papel ng mass media sa paghahatid ng tama at mapagkakatiwalaang impormasyon, lalo na sa gitna ng paglaganap ng disinformation sa social media.
Ayon kay Atty. Cayosa, mahalaga ang ginagawang pagtalakay maging ng Radyo Veritas na himpilan ng Simbahan upang maihayag sa taumbayan ang katotohanan sa kasalukuyang pag-usad ng paglilitis at maiwasan ang mga maling impormasyon na dulot ng mga fake news ng mga bayarang trolls.
“Maganda na tinatalakay ninyo ito sa mass media kasi kung hindi, papaniwalaan ng taumbayan ang mga trolls na kung minsan ay iba na ang kanilang sinasabi, hindi na ang katotohanan. Ang mga trolls, mga bayaran po ‘yan… It’s a very great challenge sa mass media kasi nao-overtake kung minsan ng mga trolls ang mass media sa paghahatid ng katotohanan,” Babala ni Cayosa.
Samantala patuloy namang inaasahan sa susunod na lingo ang pagpapatuloy sa pagdinig ng impeachment court kung saan magsisimula nang iharap ang mas maraming ebidensya at mga testigo kaugnay ng mga reklamong inihain laban kay Vice President Sara Duterte.
