307 total views
Nagbitiw na sa puwesto si Department of Health (DOH) Secretary Teodoro Herbosa matapos magsumite ng kanyang resignation kay Pangulong Ferdinand Marcos Jr. upang bigyang-prayoridad ang kanyang rehabilitasyon kasunod ng isinagawang bilateral knee replacement surgery.
Sa inilabas na pahayag, sinabi ni Herbosa na matagumpay ang kanyang operasyon noong July 7, ngunit kinakailangan niyang tapusin ang physical therapy upang tuluyang gumaling, dahilan upang hindi na niya magampanan ang araw-araw na tungkulin bilang kalihim ng kalusugan.
“Hindi pwedeng maapektuhan ng aking rehabilitation at therapy ang araw-araw na trabaho ng Department of Health. Dahil dito, nagdesisyon akong magpasa ng aking resignation letter kay President Bongbong Marcos, Jr.,” pahayag ni Herbosa.
Nagpasalamat din ang dating kalihim kay Pangulong Marcos sa pagkakataong makapaglingkod bilang ika-30 kalihim ng kagawaran at iginiit na marami pang kailangang gawin upang ganap na maisakatuparan ang mga reporma sa sektor ng kalusugan.
“Malinaw ang mandato ng Pangulo—gawing ramdam ang serbisyong publiko… marami pa ang kailangang gawin para lubos na makamit ang Bagong Pilipinas,” saad ni Herbosa.
Samantala, itinalaga ng Pangulo si Dr. Jose “Brix” Pujalte Jr. bilang bagong Health secretary.
Ayon sa Presidential Communications Office, mahigit tatlong dekada nang nagsisilbi si Pujalte sa larangan ng pampublikong kalusugan, hospital administration, at medical education matapos pumasok sa DOH noong 1991 at magsilbing Medical Center Chief II ng Philippine Orthopedic Center noong 2014.
Nagtapos si Pujalte ng Doctor of Medicine sa University of the Philippines College of Medicine at Master’s in Hospital Administration sa Ateneo Graduate School of Business, at nagsilbi ring pangulo ng Philippine Orthopedic Association at ASEAN Orthopaedic Association, bukod sa pagiging founding president ng Philippine Shoulder Society at founding member ng Philippine Spine Society.
