291 total views
Binigyang-diin ng Caritas Philippines na ang tunay na kaunlaran ay hindi lamang nasusukat sa paglago ng ekonomiya o sa dami ng naibabahaging tulong, kundi sa pagtiyak na ang paraan ng paglikha ng yaman at pagpapaunlad ng lipunan ay may paggalang sa dignidad ng tao, katarungang panlipunan, at pangangalaga sa kalikasan.
Sa inilabas na pastoral reflection, sinabi ni Caritas Philippines President, San Carlos Bishop Gerardo Alminaza na nagpapasalamat ang Simbahan sa lahat ng sumusuporta sa misyon nito sa pamamagitan ng pagtulong sa mahihirap, pagtugon sa kalamidad, at pagsusulong ng Ebanghelyo.
Gayunman, iginiit ni Bishop Alminaza na mahalaga ring suriin kung ang pinagmumulan ng yaman at mga programang pangkaunlaran ay tunay na nagsisilbi sa kabutihang panlahat.
“Charity can never be separated from justice, nor love for the poor from care for creation. As Pope Francis reminds us in Laudato Si’, ‘everything is interconnected.’ The cry of the earth and the cry of the poor are one,” pahayag ni Bishop Alminaza.
Ipinaliwanag ng obispo na dahil sa paninindigang ito ay patuloy na isinusulong ng Catholic Bishops’ Conference of the Philippines (CBCP) ang responsableng pangangasiwa ng mga yaman ng simbahan, kabilang ang mga etikal na pamumuhunan, pagsusulong ng ecological conversion, at hindi pagtanggap ng mga donasyong nagmumula sa mga gawaing nagdudulot ng matinding pinsala sa tao at sa kalikasan.
Nilinaw naman ni Bishop Alminaza na ang layunin ng simbahan ay hindi kondenahin ang sinuman kundi hikayatin ang bawat isa—maging ang simbahan mismo, pamahalaan, negosyo, at lipunan—na patuloy na magsuri at magbagong-loob sa liwanag ng Ebanghelyo.
“The Church’s mission is never to condemn persons but to proclaim principles that serve the common good,” ayon pa sa Obispo.
Kasabay nito, hinikayat din ng obispo ang simbahan na higit na kilalanin ang mga “hidden witnesses of the Gospel” o mga karaniwang mananampalatayang tahimik na nagsasabuhay ng pananampalataya sa araw-araw.
Kabilang dito ang mga magulang, katekista, boluntaryo, kabataan, magsasaka, mangingisda, at iba pang naglilingkod sa kanilang pamilya, komunidad, at sa pangangalaga ng kalikasan nang hindi naghahanap ng pagkilala.
“The Gospel teaches us that greatness is measured not by prominence, wealth or recognition, but by love expressed in humble service,” ayon kay Bishop Alminaza.
Naniniwala ang Caritas Philippines na ang pinakamataas na anyo ng pananagutang panlipunan ay hindi lamang ang pagbibigay ng tulong matapos makalikom ng yaman, kundi ang pagtiyak na ang mismong paraan ng paglikha nito ay nagsusulong ng dignidad ng tao, kapayapaan, katarungan, at pangangalaga sa ating nag-iisang tahanan.
