13,027 total reads
Nakikiisa ang Saint Louis University (SLU) sa Baguio City sa adbokasiya ng Catholic Educational Association of the Philippines (CEAP) sa panawagan para sa pagsasagawa ng “Dapat Isa Lang” signature campaign bilang suporta sa pagsusulong ng isang tunay na Anti-Political Dynasty Law sa pamamagitan ng People’s Initiative.
Layunin ng kampanya na makalikom ng mga lagda mula sa mga rehistradong botante bilang bahagi ng pagsusulong ng panukalang batas na naglalayong mabigyan ng mas pantay na pagkakataon ang mga Pilipino na makapaglingkod sa pamahalaan at mapalawak ang political inclusivity sa bansa.
Isasagawa ang signature campaign sa Silang Lobby ng Saint Louis University sa Baguio City sa Hulyo 16 hanggang 17, 2026 at Hulyo 20 hanggang 24, 2026, kung saan inaanyayahan ang mga rehistradong botante sa Baguio City na lumagda sa petisyon.
“In solidarity with the Catholic Educational Association of the Philippines, Saint Louis University (SLU) will be conducting the Dapat Isa Lang signature campaign to pass a genuine anti-political dynasty law through a People’s Initiative. If you are a registered voter in Baguio, drop by during these dates and sign the petition. Dates: 16-17 July 2026 and 20-24 July 2026 Venue:
Silang Lobby.” Bahagi ng paanyaya ng SLU.
Ayon sa SLU, mahalaga ang bawat lagda upang maipakita ang suporta ng mamamayan sa pagsusulong ng repormang magbibigay ng pantay na oportunidad sa paglilingkod-bayan at magpapalakas sa demokratikong partisipasyon ng mga Pilipino.
“Every signature matters in the advocacy for political inclusivity, ensuring equal opportunities for public service.” Dagdag pa ng SLU.
Bahagi ang naturang inisyatiba ng patuloy na pakikiisa ng mga institusyong pang-edukasyon sa pagtataguyod ng mabuting pamamahala, pananagutan, at aktibong pakikilahok ng mamamayan sa mga usaping may kaugnayan sa kinabukasan ng bansa.
Una ng nakibahagi ang ilang mga opisyal at lingkod ng Simbahan sa paglagda sa signature campaign bilang bahagi ng pagsusulong ng mga repormang nagtataguyod ng pananagutan, mabuting pamamahala, at mas malawak na representasyon sa sistemang pampulitika ng bansa.
