12,450 total reads
Inaasahang sisimulan ng House prosecution panel sa Miyerkules ang paglalahad ng mga ebidensya kaugnay ng sinasabing maling paggamit ng P612.5 milyong confidential at intelligence funds ni Vice President Sara Duterte.
Bahagi ito ng Article I ng Articles of Impeachment na nag-aakusa sa Bise Presidente ng culpable violation of the Constitution, graft and corruption, at betrayal of public trust dahil sa paggamit ng confidential funds ng Office of the Vice President at Department of Education noong siya pa ang kalihim ng tanggapan.
Ayon kay Bicol Saro Party-list Representative Terry Ridon, isa ito sa mga pinakamahahalagang bahagi ng paglilitis dahil dito tatalakayin ang paggamit ng malaking halaga ng pondo ng bayan.
“Yan ang inaasahan natin sa pagsalang hopefully as early as Wednesday (next week)…So, ‘yung confidential misuse ito po ‘yung isa sa mga pinaka aantay ng bayan na talakayin at presentation ng ebidensya dahil pag-uusapan dito ang malalaking usapin,” ayon kay Ridon.
Inaasahang ilalahad ng prosekusyon ang mga pangalan ng mga sinasabing tumanggap ng confidential funds, kabilang ang kontrobersyal na pangalang Mary Grace Piattos at iba pang recipient na kinukuwestiyon ang pagkakakilanlan.
“Ilalahad din doon ang PSA report kung saan sinasabi that these particular personalities do not actually exist. They were never born, they were never married, they had never died in the Philippines. So yan po yung ilan sa mga pwedeng mailatag dyan po sa confidential funds misuse,” dagdag pa ng kongresista.
Kasama rin sa mga ebidensyang ihaharap ang mga ulat tungkol sa umano’y magkakaparehong lagda sa mga acknowledgement receipt at mga dokumentong mula sa Philippine Statistics Authority o PSA na nagsasabing hindi nakita sa kanilang records ang ilang pangalan ng mga recipient.
Ayon kay Ridon, mahalaga rin sa presentasyon ng prosekusyon ang mga findings ng Commission on Audit o COA, na naglabas ng notice of disallowance para sa bahagi ng confidential funds at nag-utos na maibalik ang nasa P448 milyong halaga ng umano’y hindi naaayon na gastos.
Kabilang dito ang P73 milyong disallowed expenses na naging pinal na umano ang desisyon ng COA.
Iginiit ng prosekusyon na mahalagang masuri ang paggamit ng confidential funds dahil ang pondong sangkot ay mula sa buwis ng mamamayan at dapat mapatunayan kung nagamit ito sa tamang layunin.
