3,582 total views
Hinimok ni Cardinal Luis Antonio Tagle, Pro-Prefect ng Dicastery for Evangelization, ang mga mananampalataya na iwasan ang agarang paghatol sa kapwa at sa halip ay tularan ang Diyos na nagbibigay ng pagkakataon sa bawat makasalanan na magbago.
Sa pagninilay sa Misa para sa Ika-16 na Linggo sa Karaniwang Panahon sa Mary, Mother of Hope Chapel sa The Landmark Manila Bay, ipinaliwanag ng kardinal ang talinghaga ni Hesus tungkol sa trigo at mga damo bilang larawan ng Kaharian ng Diyos, kung saan magkasabay na umiiral ang mabuti at masama habang hinihintay ang takdang panahon ng paghuhukom.
Ayon kay Cardinal Tagle, maaaring magtaka ang marami kung bakit pinahihintulutan ng Diyos na manatili ang kasamaan sa mundo, ngunit ang sagot ay matatagpuan sa Kanyang awa at pagtitiis.
Aniya, hindi layunin ng Diyos na agad lipulin ang makasalanan kundi bigyan ito ng pagkakataong magsisi at magbalik-loob.
“He does not want to destroy His creature, who is a sinner. He loves the sinner and gives the sinner a chance,” ayon kay Cardinal Tagle.
Binigyang-diin ng kardinal na ang habag ng Diyos ay hindi nangangahulugang mawawala ang katarungan, sapagkat darating pa rin ang takdang panahon ng paghuhukom.
Dahil dito, sinabi ni Cardinal Tagle na dapat maging maingat ang mga Kristiyano sa pagtingin sa kapwa at piliing ituwid sa halip na basta punahin.
Inihalimbawa pa nito ang turo ni San Agustin na ang mga taong laging nakatuon sa pagkakamali ng iba ay kadalasang hindi nakikita ang sarili nilang pagkukulang.
“Those who criticize the faults of others, normally, usually, they are the ones who do not admit that they are also at fault… Sabi ni San Agustin, untruthfulness leads to just criticism, but no desire to correct,” saad ni Cardinal Tagle.
Sa huli, pinaalalahanan ni Cardinal Tagle ang mga mananampalataya na gamitin ang awa, pagpapakumbaba, at hangaring maituwid ang kapwa sa halip na maging mapanghusga, sapagkat ang tunay na paghuhukom ay nananatiling nasa kamay ng Diyos.
“The choice is ours, whether we criticize or we correct someone,” ayon kay Cardinal Tagle.
