15,793 total reads
Nagpahayag ng pakikiisa ang Diocese of Bayombong kina Atty. Fidel Santos at Atty. Ed Balgos na nahaharap sa cyber libel complaint kaugnay ng kanilang pagbibigay ng libreng serbisyong legal sa mga komunidad na nagtatanggol sa mga watershed at kalikasan sa Nueva Vizcaya at Quirino.
Sa pahayag, binigyang-diin ni Bayombong Bishop Jose Elmer Mangalinao ang patuloy na pagsusulong ng diyosesis sa pangangalaga sa sangnilikha bilang bahagi ng misyon ng Simbahan.
Ayon sa obispo, ang pangangalaga sa kagubatan, ilog, at watershed ay pananagutang ipinagkatiwala ng Diyos sa sangkatauhan at nakaugat sa mga aral ng Ebanghelyo, Katuruang Panlipunan ng Simbahan, at ensiklikal na Laudato Si’ ni Pope Francis.
“We have consistently encouraged the responsible stewardship of our forests, rivers, and watersheds as sacred gifts entrusted to our care,” pahayag ni Bishop Mangalinao.
Sinabi ng obispo na kilala ng diyosesis sina Santos at Balgos bilang mga abogadong may integridad at malasakit na nag-alay ng kanilang kaalaman upang tulungan ang mga pamayanang nagsusulong ng pagpapatupad ng mga batas pangkalikasan.
“Their commitment to justice and the common good reflects the finest ideals of the legal profession,” ayon sa obispo.
Iginiit ng Diocese of Bayombong na iginagalang nito ang kalayaan ng hudikatura at hindi nagbibigay ng paghatol sa nilalaman ng kasong kinahaharap ng dalawang abogado.
Gayunman, kinikilala nito ang mahalagang papel ng mga legal practitioner na naglilingkod sa mga pamayanan, lalo na sa pagtatanggol sa karapatan sa isang malinis at ligtas na kapaligiran.
Dagdag pa ng diyosesis, bahagi ng kanilang ipinagtatanggol ang karapatan ng bawat Pilipino sa isang balanse at malusog na kapaligiran na nakasaad sa Saligang Batas.
Nanawagan naman si Bishop Mangalinao na manaig ang katotohanan, katarungan, pagiging patas, at wastong proseso ng batas sa nagpapatuloy na legal na proseso.
“May God continue to bless all who work with integrity for the protection of creation and the promotion of the common good,” saad ni Bishop Mangalinao.
