13,655 total reads
Ipinaliwanag ni Social Weather Stations (SWS) Director of Communications and Information Technology Leo Laroza na normal ang pagbaba ng trust rating ng isang pangulo habang tumatagal ito sa panunungkulan.
Sa panayam sa programang Veritas Pilipinas, sinabi ni Laroza na karaniwan ding nakikita ang pagbaba sa satisfaction rating ng isang administrasyon habang lumilipas ang panahon.
“Tungkol po sa Trust Rating, sa isang presidente po typically habang tumatagal sa kanyang panunungkulan, sa kanilang administrasyon normal po na may pagbaba, nangyayari rin po yan sa satisfaction rating so normal po yan,” Bahagi ng pahayag ni Laroza.
Ayon sa opisyal ng SWS, malaking salik din ang uri ng impormasyong natatanggap ng mga mamamayan sa paghubog ng kanilang pananaw sa Pangulo.
Gayunman, aminado si Laroza na hindi madaling matukoy ng isang ordinaryong mamamayan kung ang isang impormasyon ay fake news na walang katotohanan o hindi.
“Pagdating naman po sa information, yes malaking factor po yung uri ng information na nakukuha ng ating mga kababayan. Ngayon kung pagdating po sa pagiging fake news po ito o hindi, hindi na po masyadong nadi-determine ng isang reader yan kung fake ba ang nababasa niya o hindi,” Dagdag pa ni Laroza.
Paliwanag ni Laroza, kahit malaman ng isang tao na peke ang isang impormasyon, may kanya-kanya pa rin itong paraan ng pagproseso ng naturang impormasyon upang makabuo ang sariling opinyon tungkol sa Pangulo.
Tinalakay rin ng opisyal ng SWS ang pagkakaiba ng opinyon ng mga mamamayan batay sa lokasyon, partikular ang pagitan ng Metro Manila at mga lugar sa labas nito.
“Yung tungkol po sa distribution, tama malaki rin yung pagkakaiba per area kung kaya’t makikita na may kaibahan po talaga kung minsan ang opinion na nanggagaling sa sentro sa Metro Manila compared sa outside of Metro Manila,” Ani Laroza.
Sa kabila ng iba’t ibang salik na maaaring makaapekto sa trust rating, binigyang-diin ni Laroza na ang malinaw na ipinapakita ng survey ay ang normal na pagbaba ng trust rating habang mas tumatagal ang isang pangulo sa kanyang administrasyon.
