16,300 total reads
Binigyan-diin ng propesor ng Journalism sa University of the Philippines na hindi katanggap-tanggap ang malawakang pagbatikos ni Vice President Sara Duterte sa kalidad ng pamamahayag sa Pilipinas.
Sa panayam sa programang Veritas Pilipinas, sinabi ni Dr. Danilo Arao, propesor ng Journalism sa UP-Diliman College of Media and Communication na mali ang paglalahat na mas mababa ang kalidad ng Philippine journalism kumpara sa ibang bansa.
Ipinaliwanag ng propesor na ang naging pahayag ng Bise Presidente ay hindi maituturing na makabuluhang puna kundi isang mapanirang pag-atake sa buong hanay ng media.
“Totoo namang may mahuhusay na mga peryodista, pero mayroon ding ilan na hindi masyadong mahusay at mayroon ding unethical. Tanggap naman natin iyan. Pero ang mga tunay na peryodista, gaano man sila kahusay o kasimula pa lamang, dapat ay bukas sa constructive criticism… Yung ginawa ni Vice President Duterte, hindi po constructive. Napaka-destructive o damaging dahil parang pinapaniwala niya ang publiko na mababa ang kalidad ng mainstream media,” Bahagi ng pahayag ni Arao.
Binigyang-diin ni Arao na kasabay ng pagbatikos sa tradisyunal na media ay tila isinusulong ng bise president ang mga hyper-partisan vloggers at content creators na aniya’y kilala sa pagpapakalat ng maling impormasyon.
Ayon sa propesor, matagal nang ginagamit ang taktikang pagbanggain ang mga propesyonal na mamamahayag at mga content creator upang pahinain ang kredibilidad ng tradisyunal na media.
Binalaan din niya ang publiko sa panganib ng social media algorithms na nagbibigay ng insentibo sa pagpapakalat ng maling impormasyon dahil nagiging viral at kumikita ang mga gumagawa nito.
“Kapag nagpapakalat ng kasinungalingan at nag-viral, kumikita pa sila. Kaya ang praktikal na payo natin, huwag nang mag-engage sa kanilang content. Kung kailangang i-fact-check, i-screenshot na lamang at huwag nang direktang i-link ang kanilang original na post,” Dagdag pa ni Arao.
Inamin din ni Arao na hindi lahat ng media organizations ay pare-pareho ang pamantayan sa pamamahayag at mayroon ding mga organisasyong maaaring punahin at may pagkiling ngunit gayunpaman nananatiling mahalaga ang transparency at editorial independence sa mga lehitimong news organizations.
“May matitino at mayroon ding hindi. Pero sa mga lehitimong media organizations, ang mahalaga ay may transparency at sa ngayon, hindi pa natin nakikitang naaapektuhan ang kanilang mga balita dahil sa mga interes ng kanilang mga may-ari,” Ayon pa kay Arao.
Matatandaang patuloy na binibigyang-diin ng Simbahang Katolika ang mahalagang papel ng malaya at responsableng pamamahayag sa pagtataguyod ng katotohanan at ng kabutihang panlahat.
Sa mensahe ni Pope Leo XIV para sa mga Catholic communicators, hinikayat ng Santo Papa ang mga mamamahayag na gamitin ang komunikasyon bilang kasangkapan ng katotohanan, paggalang sa dignidad ng tao, at pagsusulong ng kapayapaan.
