1,239 total reads
Naniniwala ang House Prosecution panel na mapatutunayan ang mga alegasyon sa impeachment case laban kay Vice President Sara Duterte, anuman ang maging desisyon ng Senado sa bilang ng mga boto na kailangan para sa conviction.
Ito ang iginiit ni House Prosecutor at Akbayan Partylist Rep. Manuel Diokno sa oral arguments sa impeachment court kaugnay ng usapin sa voting threshold.
Ayon kay Diokno, hindi nakadepende sa bilang ng boto ang lakas ng ebidensyang ilalatag ng prosekusyon, anuman ang maging pasya ng impeachment court, mananatili ang kanilang tungkuling ilahad ang ebidensya at patunayan ang mga nakasaad sa Articles of Impeachment.
“The Prosecution is confident in its case. The Prosecution has been ready to prove its case. And the Prosecution trusts the independent judgment of this honorable Court,” ayon kay Diokno.
Dagdag pa ng mambabatas, “And whatever the threshold is, however this Court decides the issue before it today, the Prosecution will do its job.”
Kabilang sa tinalakay ang interpretasyon sa probisyon ng Konstitusyon na nangangailangan ng two-thirds vote para sa conviction, partikular kung ilan ang dapat isama sa kabuuang bilang ng mga senador na pagbabatayan ng two-thirds.
Sinabi ni Diokno na magkakaiba man ang naging paliwanag ng apat na amici curiae, hindi ito nangangahulugan na awtomatikong 16 na boto ang kinakailangan sa lahat ng pagkakataon.
Iginiit din ng mambabatas na ang pagtukoy sa tamang bilang ng mga senador na kabilang sa denominator ay hindi nangangahulugang binabago ang requirement na two-thirds.
