3,348 total reads
Hindi nakikitang hadlang ng House prosecution sa kanilang kaso laban kay Vice President Sara Duterte ang naging desisyon ng Senate impeachment court kaugnay ng kanyang mga bank at financial records.
Ayon kay House prosecutor at San Juan City Representative Ysabel Maria Zamora, magpapatuloy ang kanilang plano sa paglilitis kahit hindi pinagbigyan ng impeachment court ang kanilang ‘Request for Admission.’
“This is not a setback, I think. You know, even if the ruling was adverse to the prosecution, I think we will still continue with the strategy, the plan of the prosecution,” ayon kay Zamora.
Saklaw ng naturang kahilingan ang 104-items, kabilang ang pagiging ‘authentic’ ng mga bank records na dinala sa korte at pagmamay-ari ng mga account na nakasaad dito.
Sa desisyon ni Senate President at Presiding Officer Francis Escudero, hindi maaaring pilitin ang bise presidente na sagutin o akuin ang mga ito dahil sa kanyang karapatang konstitusyonal laban sa self-incrimination.
Binigyang-diin din ng korte na ang hindi pagsagot ni Duterte ay hindi maaaring ituring na pag-amin at hindi maaaring gamitin ang proseso upang ilipat sa bise presidente ang tungkuling patunayan ng prosecution ang mga alegasyon sa impeachment.
Gayunman, mananatili sa rekord ng kaso ang Request for Admission, kasama ang pagtutol ng depensa at desisyon ng korte, ngunit hindi ito maaaring gamitin bilang ebidensiya laban sa Pangalawang Pangulo.
Ayon naman kay House impeachment adviser at spokesperson Robert Barbers, hindi nito mapipigilan ang prosecution na iharap ang mga bank records bilang ebidensiya sa alegasyon ng unexplained wealth.
Nauna nang pinayagan ng impeachment court ang subpoena sa bank, tax at Anti-Money Laundering Council records matapos makita nitong may kaugnayan ang mga dokumento sa alegasyon.
“We’re glad that they’ve ruled that they will accept and admit the records as part of the evidence that the prosecution panel will deliberate on,” ayon naman kay Barbers.
Humigit-kumulang sampung bangko na rin ang nagsumite ng kanilang mga rekord.
Inatras ng prosecution nitong Lunes ang Request for Admission at sa halip ay iminungkahi ang pagkakaroon ng ‘stipulation’ sa depensa para mapabilis ang paglalahad ng ebidensiya.
Kung hindi mapagkasunduan, posibleng isa-isang ipatawag ng prosecution ang mga kinatawan ng mga bangko upang kilalanin at patotohanan ang mga isinumiteng rekord.
