1,499 total reads
Hinimok ni Cebu Archbishop Alberto Uy ang mga deboto ng Mahal na Birheng Maria na isabuhay ang kanilang debosyon sa pamamagitan ng tunay na pagbabagong-loob at paglilingkod sa kapwa, lalo na sa mga mahihirap.
Sa kanyang homiliya sa kapistahan ng Our Lady of Fatima sa replika ng Capelinha de Fatima sa San Remigio, Cebu nitong October 13, binigyang-diin ng arsobispo na hindi sapat ang pagdarasal ng Santo Rosaryo, pagdalo sa nobena at prusisyon, at pagsasagawa ng mga pilgrimage kung hindi nagbubunga ang mga ito ng pagbabago sa buhay.
“Mary does not want devotees who simply admire her. She desires disciples who imitate her,” ayon kay Archbishop Uy.
Binigyang-diin din ng pastol na dapat humantong sa kongkretong pagkilos ang pananalangin, partikular sa pagtulong sa mga nangangailangan.
“Prayer should eventually move our feet. The Rosary in our hands should open those same hands to the poor,” ani ng arsobispo.
Ayon sa arsobispo, dapat makita sa debosyon ng mga mananampalataya ang malasakit sa mga nagdadalamhati, pagdalaw sa mga maysakit, pagpapatawad sa mga nakasakit sa kanila, pakikinig sa mga nalulungkot, at pagtulong sa mga pamilyang nahihirapan sa buhay.
Paliwanag ni Archbishop Uy na ang tunay na debosyon kay Maria ay dapat humantong sa mas malalim na pagkilala at pagsunod kay Hesukristo.
“A true Marian devotee should eventually be recognizable not simply by the Rosary in his or her hand, but by Christ visible in his or her life,” giit pa ng arsobispo.
Samantala, iniugnay ng arsobispo ang mensahe ng Mahal na Birhen sa Fatima —na manalangin, magsisi, at manumbalik sa Diyos —sa mga patuloy na suliraning kinakaharap ng daigdig, kabilang ang galit, pagkakawatak-watak, karahasan, at kasalanan.
“The deepest problems of our world begin in the human heart. And therefore, the healing of our world must also begin there,” ayon kay Archbihsop Uy.
Hinikayat ng arsobispo ang mga mananampalataya na hayaang baguhin ng Diyos ang kanilang puso, ilapit sila ng Birheng Maria kay Hesus, at turuang magmahal at maglingkod sa kapwa.
Binigyang-diin ng arsobispo na ang pinakamahalagang handog sa Mahal na Birhen ay hindi lamang mga bulaklak at panlabas na pagpapakita ng debosyon, kundi isang pusong nagbalik-loob sa Diyos, isang buhay na nakasentro kay Kristo, at mga kamay na nakahandang maglingkod at kumalinga sa mga higit nangangailangan at mahihinang sektor ng lipunan.
