1,302 total reads
Hinimok ni San Fernando, La Union Bishop Daniel Presto ang mananampalataya na gawing inspirasyon ang buhay ng mga Santo sa pagsasabuhay ng kabanalan at pagpapaigting ng panalangin para sa mga yumaong mahal sa buhay ngayong All Saints’ Day at All Souls’ Day.
Ayon kay Bishop Presto,Chairman ng Catholic Bishops’ Conference of the Philippines (CBCP) – Episcopal Commission on Evangelization and Catechesis (ECEC) and Member ng Episcopal Commission on Catholic Education (ECCE) , mahalagang tularan ang mga banal na nagpakita ng pananampalataya, paglilingkod at malasakit sa mga mahihirap, maysakit, bilanggo at mga nangangailangan.
“Sa pagdiriwang natin ng All Saints’ Day ay pinagninilayan natin ang buhay ng mga santo at santa, kung saan ay makakakuha tayo ng inspirasyon upang mamuhay ayon sa kabanalan. Kabilang sa kanila ang mga martir na nag-alay ng kanilang buhay alang-alang sa pananampalataya. Mayroon ding mga santo na nagpakita ng kabutihan sa pamamagitan ng pagtulong sa mga mahihirap, maysakit, bilanggo, mga bata at kabataang nangangailangan. Sikapin din nating tularan ang kanilang magagandang halimbawa at isabuhay ang mga pagpapahalagang Kristiyano,” ayon sa mensaheng pinadala ni Bishop Presto sa Radyo Veritas.
Binigyang-diin din ng Obispo na higit sa pagdadala ng bulaklak at pagsisindi ng kandila sa mga puntod, mas mahalagang ipagdasal ang mga kaluluwa ng mga pumanaw.
Hinikayat ng Obispo ang mga Pilipino na panatilihing malinis ang mga sementeryo at gawing pagkakataon ang pagdalaw upang manalangin at magnilay.
Hindi rin kailangang sa mismong araw ng All Saints at All Souls Day lamang bumisiya bumisita sa mga libingan dahil maaari itong gawin sa ibang araw at isang tradisyon na mapapatibay ang samahan ng mga pamilya o kaibigan. .
“Sa November 2 naman ay ang pagdiriwang natin ng All Souls’ Day kung saan ay ating inaalala ang mga yumao nating mga mahal sa buhay sa pamamagitan ng pagdalaw natin sa kani-kanilang mga libingan at pagdarasal para sa kanila. Hindi sapat na tayo ay nagdadala ng flowers at nagtitirik ng kandila sa kanilang puntod. Ang mas mahalaga ay ang ating dasal para sa kanila. Kung hindi man tayo makapunta sa sementeryo sa November 1 or 2, ay mayroon pa ring ilang araw na puwede tayong makadalaw “ bahagi pa ng mensaheng pinadala ni Bishop Presto sa Radyo Veritas.
