4,241 total reads
Dapat gamitin ang politika upang tugunan ang paghihirap ng mamamayan at labanan ang kawalang-katarungan, ayon kay Pope Leo XIV.
Sa kanyang General Audience sa Vatican nitong Nobyembre 4, sinabi ng Santo Papa na ang mga pinunong kumikilos para sa mga taong naghihirap at nakararanas ng kawalang-katarungan ay nagbibigay ng pag-asa sa kinabukasan ng sangkatauhan.
“Politics that tends to the wounds of peoples and of those who suffer injustice offers grounds for hope for the future of humanity,” ayon kay Pope Leo.
Sa pagpapatuloy ng kanyang pagtalakay sa dokumentong Gaudium et Spes ng Ikalawang Konsilyo Vaticano, binigyang-diin ng Santo Papa na hindi sapat ang pag-unlad ng teknolohiya kung hindi naman napapakinabangan ng tao ang pag-unlad ng ekonomiya.
Hinimok din ng pinunong pastol ang mga bansa na wakasan ang diskriminasyon laban sa mahihirap, mga mahihinang sektor at mga migrante.
Binigyang-diin din ng Santo Papa ang kahalagahan ng paggawa sa ekonomiya.
“Work must never be distorted to the detriment of people, the common good or creation,” dagdag pa ng pinunong pastol.
Ayon kay Pope Leo, hindi katanggap-tanggap ang kawalan ng trabaho, pagsasamantala sa mga manggagawa at mga kondisyong naglalagay sa panganib sa kanilang kalusugan at buhay.
Dapat din aniyang magkaroon ng pagkakataon ang mga manggagawa na makilahok sa mga desisyong nakaaapekto sa kanilang trabaho, kabilang ang sa pamamagitan ng mga unyon.
Iginiit ng Santo Papa, “The political community exists for the sake of the common good.”
Dagdag pa niya, maaaring magtulungan ang Simbahan at pamahalaan para sa kapakanan ng lipunan, habang iginagalang ang kani-kanilang tungkulin at kalayaan.
Hinimok din ni Pope Leo XIV ang mga kabataan na tularan ang mga taong naging tapat sa paglilingkod sa lipunan, at ang mga pamayanang Kristiyano na palakasin ang pagtuturo ng panlipunang aral ng Simbahan.
