918 total views
Nanawagan ang Restorative Justice Ministry ng Archdiocese of Manila sa Pamahalaan na bigyang pansin ang patuloy na pagsisikip ng mga piitan sa Bansa.
Ito ayon kay ni Sr. Zeny Cabrera ng Caritas Manila RJ Ministry kaugnay na rin sa patuloy na ‘Congestion’ sa mga kulungan maging sa mga presinto ng Pulis.
Iginiit ni Sister Cabrera na napakababa sa standard ng maayos na kulungan ang kasalukuyang kalagayan ng mga piitan sa buong bansa bunsod na rin ng mabagal na Justice System.
“Lahat yata ng kulungan dito sa Pilipinas, kung titingnan natin ay hindi natin sasabihin pasado sa ating standards ang pagtingin sa corrections bilang way or road to freedom kasi ang kanilang kalagayan ay mas mababa sa tamang standard na pagtingin sa maayos na bilangguan,” ayon kay Sr. Cabrera.
Sa ulat Commission on Audit (CoA) ay tumaas ng 600 porsiyento ang mga nakakulong sa kabuuang higit sa 146,000 na mga selda.
Lumalabas din sa ulat na ang paglaki ng bilang ng mga Preso sa bawat kulungan ay bunsod na rin ng kampanya laban sa ilegal na droga ng Pamahalaan.
Paliwanag pa ng madre, bagama’t may kani-kaniyang programa ang Philippine National Police (PNP), Bureau of Jail Management and Penology (BJMP) at Department of Justice (DoJ) sa pangangalaga sa kalinisan, pagkain at seguridad ng mga bilanggo ay hindi pa rin maisasaayos dahil na rin sa dami ng bilang ng mga nakakulong.
Ang RJ Ministry ay binubuo ng mga Madre, Pari at Volunteers mula sa pitong Diyosesis na bahagi ng Archdiocese of Manila kabilang ang Diyosesis ng Cubao, Parañaque, Novaliches, Antipolo, Caloocan at Pasig na nagbibigay ng programa tulad ng Edukasyon, Livelihood training at Serbisyong legal sa mga nakakulong.
