319 total views
Naniniwala ang IBON Foundation na malaki ang naiambag ng reporma sa pagbubuwis ng Pamahalaan o ang Tax Reform for Accelaration and Inclusion (TRAIN) Law sa patuloy na pagtaas ng Inflation Rate sa Bansa.
Ayon kay IBON Executive Director Rosario Bella Guzman, ang mataas na Inflation Rate ay bunsod ng paggalaw sa presyo ng produktong petrolyo sa pandaigdigang merkado at pagtaas ng presyo ng bilihin.
Itinuturing ng grupo na kawalan ng damdamin ng Pamahalaan ang pagpatong ng buwis sa presyo ng produktong petrolyo sa Bansa dahilan nang pagtaas ng Inflation Rate.
“It’s the Insensitivity sa Government na naglagay siya ng isang consumption tax o ang TRAIN Law na ini-impose dahil pinatong yun mismo doon sa tumataas na presyo ng langis, kumbaga dinagdagan pa, so inflationary talaga yung maglagay ka ng tax on diesel for example or Kerosene tsaka LPG kasi marami ang produkto na nakadepend doon yun talaga ang nagtulak sa inflation at its highest.” pahayag ni Guzman sa Radio Veritas.
Sa pagsusuri ng grupo nangunguna sa may pinakamataas na presyo ang produktong gulay, karne, mais at bigas.
Nilinaw ng IBON Foundation na nangangahulugan na ang pagkain ang pinakaapektado sa pagtaas ng presyo ng produktong petrolyo dahil maliban sa paggamit ng Liquified Petroleum Gas (LPG) sa pagluluto, gumagastos din ang mga mangangalakal sa Transportasyon sa pagdala ng mga produkto sa mga pamilihan sa Bansa.
Samantala, ibinahagi rin ng IBON Foundation na nangunguna ang Pilipinas sa Asya na may pinakamataas na unemployment rate o mga mamamayang walang trabaho na naitala sa 9.1 – porsiyento.
Bukod pa rito ang 5,400 mga Filipinong umaalis sa bansa araw-araw upang makipagsapalaran sa ibayong dagat at ang mahigit sa 2-milyong Discouraged Workers na inalis ng Pamahalaan sa talaan ng Labor Force.
Sa kabuuang pagsusuri ng IBON Foundation, lumabas na umiigting ang paghihirap ng mga mamamayan sa Pilipinas sa nagdaang mahigit 2-taong panunungkulan ni Pangulong Rodrigo Duterte.
“Makikita natin na talagang umigting at tumindi ang pahirap sa mamamayan nitong nakaraang 6 na buwan lang kung titingnan natin nagkaroon lang ng Precedent o naumpisahan noong 2 taon nga ng kasalukuyang nanunungkulan.” dagdag pa ni Guzman.
Sa panlipunang katuruan ng Simbahang Katolika, kung mabibigyan ng sapat at marangal na trabaho ang lahat ng mamamayan ay maghahatid ito kaunlaran hindi lamang sa Bansa kundi maging sa pamilya ng mga nangangailangan.
