317 total views
Magandang pagkakataon ang pagsasagawa ng Genfest 2018 sa bansa upang maipamalas ng mga Filipino ang positibong imahen at natatanging kultura ng Pilipinas sa buong mundo.
Ito ang ibinahagi ni Apostolic Nuncio to the Philippines Archbishop Gabriele Giordano Caccia kaugnay sa pambihirang pagkakapili sa Pilipinas upang maging host ng Genfest 2018 na sa kauna-unahang pagkakataon ay isinagawa dito sa Asya.
Ayon sa Arsobispo, isang pambihira at magandang pagkakataon ang 3-araw na pagtitipon ng mga delegado mula sa iba’t ibang bansa upang maipamalas ng mga Filipino partikular na ng mga kabataan ang natatanging katangian, kagalingan at kahusayan.
“It’s good to see that all people are coming from different countries, different cultures are united that gives a lot of hope and Filipino’s can show the best of their own qualities during this special occasion. So it’s a good event also to spread a very positive image of the Filipino people in the world…” pahayag ni Archbishop Caccia sa panayam sa Radyo Veritas.
Itinuturing ng Arsobispo na napakagandang adhikain ang pagsasagawa ng ika-11 edisyon ng Genfest sa Asya na kadalasang isinasagawa sa Europa.
Sinabi ng Arsobispo na pinatotohanan ng pagtitipon ang pagkakaisa ng mga mayroong magkakaibang karanasan at pinagmulan.
“The title is Beyond Borders so the word of peace, the word of love in itself as a dimension which is universal and moving from one continent to another is the sign that we are following the right path…”pahayag ni Archbishop Caccia.
Bukod dito, sinabi ng Arsobispo na nagpapakita ng kongkretong pag-asa para sa pagkakaroon ng malawakang pagkakaisa sa hinaharap ang Genfest na naglalayong maimulat ang mga kabataang kalahok na maging ang mga maliliit na pagkilos ay makapagdudulot ng mga positibong pagbabago.
“It’s one of the sign that to make people have hope for the future and especially this new generation if not jam by biography but in the spirit they will bring good change for a better world…” Pagbabahagi ni Archbishop Caccia.
Tinatayang aabot sa 6,000 mga kabataan mula sa higit 100 mga bansa ang nakibahagi sa 3-day Genfest 2018.
Ang Genfest ay isang pambihirang pagtitipon ng mga kabataan mula sa iba’t ibang bansa na mayroong magkakaibang kultura, lahi at pananampalataya.
Isinasagawa ang Genfest kada 6 na taon na nagsimula noong 1973 at ngayon ay ang ika-11 edisyon na ng pagtitipon na sa kauna-unahang pagkakataon ay isinagawa sa Pilipinas.
