573 total reads
Pinalakas ni Manila Archbishop Luis Antonio Cardinal Tagle ang Ecology Ministry ng Archdiocese of Manila.
Nilagdaan ni Cardinal Tagle ang kautusang bumuo ng Disaster Risk Reduction and Management Program sa ilalim ng Ecology Ministry ng nasabing Arkidiyosesis upang palakasin ang pagtugon sa mga nagaganap na kalamidad.
Itinalaga ni Cardinal Tagle si Caritas Manila Damayan Program Priest Minister Father Ric Valencia na bagong Minister ng DRRM at Ecology Ministry.
Layon nito na pag-iisahin at palakasin ang pagtulong at pagkilos na ginagawa ng iba’t-ibang institusyon ng Archdiocese of Manila sa Disaster Risk Reduction and Response.
Naniniwala si Fr. Valencia na ang hakbang na ito ng Archdiocese ay bahagi lamang ng seryosong pagkilos ng Simbahan para matugunan ang mga nanagap na kalamidad dahil na rin sa epekto ng nagbabagong klima at ecological imbalance.
“The Church is doing it for a long time already but this time because of our experience of Yolanda gusto nating bigyan ng pansin and elevate it into a ministry… The new normal now is the extreme weather conditions na abnormal before but normal already because of the effect of climate change, because of the ecological imbalance, dahil diyan ang Cardinal (Chito Tagle) naisip nya na icoordinate ang ginagawa ng archdiocese,” pahayag ni Fr. Valencia sa panayam ng Radio Veritas.
Kaugnay nito, mapapabilang din sa bagong ministry ang Damayan program ng Caritas Manila at Disaster Communication Program ng Radio Veritas.
Umaasa si Fr. Valencia sa matagumpay na pakikipagtulungan sa dalawang institusyon partikular na sa Radyo Veritas sa pamamagitan ng komunikasyon at pagtukoy ng pangangailangan ng ating mga kababayan.
“Isa kayo sa pinakaimportanteng aspeto ng atin pagtulong sa mga mahihirap kasi kayo ang magpaparating ng pangangailangan ng atin mga kababayan,” giit pa ni Fr. Valencia.
Batay sa ulat ng United Nations, lumalabas na ang Pilipinas ay panglima sa mga bansa na pinaka-nakakaranas ng kalamidad sa buong mundo.
Sinasabing mula 1995 hanggang 2015 ay aabot sa 274 na bagyo at iba pang natural disasters ang naranasan ng Pilipinas, isa na nga dito ang Super Typhoon Yolanda na nanalasa sa Visayas Region kung saan mahigit sa anim na libong tao ang nasawi at mahigit 15 milyong tao ang naapektuhan.
