Ito ang ginawa ni Rev. Fr. Rey Hector Paglinawan, Kura Paroko ng Most Holy Redeemer Parish sa Masambong Quezon City sa kanyang huling araw sa parokya bago lumipat sa bagong Parokyang itinalaga sa kaniya.
Ayon kay Fr. Paglinawan, bagamat nakalulungkot na aalis ito sa Parokya na kaniyang pinaglingkuran ng mahigit sa apat na taon ay tiwala itong nagampanan ang pagiging pastol ng kawan ng Diyos.
“Sa totoo lang nakalulungkot dahil magkakahiwalay na kami pero natutuwa naman ako dahil ang kayamanan ng Simbahan ay ang mga mahihirap, mas madaling ayain itong mga simpleng mamamayan natin kasi nga simple lang ang pamumuhay nila.” bahagi ng pahayag ni Fr. Paglinawan sa Radio Veritas.
Bagamat noong ika – 13 ng Agosto ang huling araw ng pari sa Parokya, pinili nitong mapalawig ng isang araw pa upang pangasiwaan ang pamamahagi ng tulong sa mga binahang residenteng nasasakupan ng parokya.
Sinabi ng Pari na ito ay pakikiisa at pagpapakita ng pagmamahal sa nasasakupang mananampalataya lalo na sa mga panahong kailangan ang pagdadamayan.
Isinagawa ang pamamahagi ng mahigit sa 700 relief packs sa mga apektadong residente pagkatapos ng huling misa nito sa Parokya.
Pinaalalahanan ng Pari ang mamamayan sa kahalagahan ng pangangalaga sa kalikasan upang maiwasang masalanta ng mga trahedya tulad ng pagbaha na dulot ng kapabayaan ng tao sa maling pagtatapon ng mga basura.
Mensahe ng pari sa mga mananampalataya ng Most Holy Redeemer Parish na maging responsableng mamamayan upang mapapanatiling malinis at maayos ang kapaligiran sang-ayon sa panawagan ng Kaniyang Kabanalang Francisco sa ensiklikal na Laudato Si.
Bukod dito pinasasalamatan ni Fr. Paglinawan lahat ng mga tumulong upang maisakatuparan ang pamamahagi ng tulong sa mga naapektuhan ng pagbaha sa pangunguna ng Diocese ng Cubao, Caritas Manila, ilang indibidwal at Radio Veritas na naging tulay upang makapanawagan ng karagdagang tulong.
