947 total reads
June 9, 2020, 12:18PM
Binighyan diin ng opisyal ng Caritas Manila na mahalagang magkaisa ang simbahan at pamahalaan sa pagtugon sa pangangailangan ng mamamayan partikular ang mga maralita.
Ayon kay Rev. Fr. Anton CT Pascual, Executive Director ng Social arm ng Archdiocese of Manila, nararapat na tugunan ang pangangailangan ng sektor ng maralitang tagalunsod lalo’t ito ang direktang naapektuhan ng COVID 19 pandemic.
Ito ang mensahe ng pari sa pagbisita sa Smokey Mountain sa Tondo Manila nitong nakalipas na Linggo upang mamahagi ng tulong sa mahigit 200 pamilya na nakatira sa dating tapunan ng mga basura.
“Magandang pagkakataon na magtulungan ang gobyerno at simbahan papaano makaahon sa kahirapan ang mga maralitang tagalunsod lalo na ang mga nakatira dito sa Smokey Mountain,” pahayag ni Fr. Pascual sa panayam ng Radio Veritas.
Matatandaang 1995 nang tuluyang isinara ang Smokey Mountain dumpsite habang 2001 naman ng itinayo ng National Housing Authority ang pabahay para sa mga residenteng nakatira sa paligid ng nito.
Sa kasalukuyang sitwasyon ng nasabing lugar ay nais ni Fr. Pascual na matulungan ang mga residente na magkaroon ng permanenteng kabuhayan upang matustusan ang pangangailangan ng kanilang pamilya.
Mensahe ng pari sa mga naninirahan sa Smokey Mountain na patuloy kumapit sa pag-asang hatid ni Kristo na muling nabuhay para sa sanlibutan at hinimok ang mamamayan na maging aktibong kasapi ng simbahan sa Parish of the Risen Christ ang parokyang nakakasakop sa lugar na pinamamahalaan ng Societas Verbi Divini (SVD)o Divine Word Missionaries.
“Huwag mawalan ng pag-asa, manalig sa Diyos pero mahalaga pa ring magkaisa at magtulungan upang mawakasan ang kahirapan,” dagdag pa ni Fr. Pascual.
Katuwang ni Fr. Pascual sa pamamahagi ng tulong sa dating bundok ng mahigit dalawang milyong metriko toneladang basura sina Rev. Fr. Melky Ukat, SVD ang kura paroko ng parokya, Rev. Fr. Lawrence Llona, SVD, Rev. Fr. Jade Licuanan at mga volunteers ng Caritas Manila at Social Services and Development Ministry ng parokya.
Labis namang nagpasalamat sa Caritas Manila at sa mga donors ang mahigit sa 200 pamilyang benipisyaryo na nabahaginan ng manna food bags at ligtas COVID 19 kit.
