326 total views
Mayroon pa ring kagalakan ang Pasko ng pagsilang sa Panginoong Hesukristo sa kabila ng mga pagsubok na naranasan ng buong mundo ngayong taon.
Ito ang mensahe ni Imus Bishop Reynaldo Evangelista sa bawat isa para sa pagdiriwang ng Pasko na tuluy na tuloy pa rin sa kabila ng mga suliraning nagdulot ng iba’t ibang karanasan sa bawat isa.
Ayon sa Obispo, hindi mahahadlangan ng Coronavirus at anumang kalamidad ang pagdiriwang ng Pasko ng pagsilang sa Panginoong Hesukristo na siyang Diyos na nagkatawang tao at ang dahilan ng pagmamahalan at pagdadamayan lalo na sa panahon ng pandemya.
“May galak pa rin ang pasko sa panahong ito ng pandemya. Hindi kayang pigilan ng coronavirus at anumang kalamidad ang pasko ng pagsilang ng Panginoon–ang Diyos na nagkatawang tao, ang dahilan ng ating pagmamahalan at pagdadamayan sa panahong ito,” ayon sa mensahe ni Bishop Evangelista.
Paalala naman ni Bishop Evangelista na dapat na ikintal sa isipan ng bawat mananampalataya ang kahalagahan ng tunay na kahulugan ng Pasko.
Ayon sa Obispo, huwag naman sanang isipin ng bawat isa na wala nang saysay ang pagdiriwang ng Pasko ngayong taon dahil lamang sa mga pagsubok na nagpahirap sa marami.
Pagbibigay-diin nito na kapag hinayaan natin na maging ganito ang ating saloobin ay sa mga materyal na bagay lamang natin itinutuon ang pagdiriwang ng Pasko ng pagsilang sa Manunubos.
“Huwag na huwag ninyong maiisip na wala nang kwenta ang pasko. Wala nang dahilan ang pagbati ng Merry Christmas dahil sa mga sinapit natin sa taong ito. Huwag po. Pagka ganyan ang ating saloobin, ibig sabihin, ay sa mga materyal na bagay lamang nakatuon ang ating pagdiriwang ng Pasko,” ayon sa Obispo.
Paliwanag pa ng Obispo na dapat nating tandaan na bago pa man maranasan ng mga tao ang kasalatan at karukhaan, una na itong naranasan ng Panginoong Hesus noong siya’y isinilang ng Birheng Maria sa sabsaban.
