438 total reads
Inaanyayahan ng lokal na pamahalaan ng Naga at ng Archdiocese of Caceres ang mamamayan sa probinsya na magpabakuna bilang proteksyon laban sa COVID-19 virus.
Sa pamamagitan ng isang video na may habang 1 minuto na nasa salitang Bikolano ay binigyang diin ni Caceres Archbishop Rolando Tria Tirona at Naga City Mayor Son Legacion ang kahalagahan ng pagpapabakuna ng COVID-19 vaccine.
Ayon sa Obispo, ang pagpapabakuna laban sa COVID-19 ay hindi lamang isang proteksyon para sa sarili kundi isa ring obligasyon para sa kapakanan ng kapwa.
Paliwanag pa ni Archbishop Tirona, isa rin itong paraan upang magpakita ng higit na pagpapahalaga sa buhay na ipinagkaloob ng Panginoon sa bawat isa.
“Sa aking mga kapatid kay Kristo! Kamusta po kayo, ito po si Bishop Roly kasama si Mayor Son Legacion. Inaanyayaan ko kayo na makilahok sa programa ng gobyerno na magpabakuna contra COVID-19. Ito ay ating obligasyon sa ating kapwa at pagpapahalaga sa buhay na binigay sa atin ng Diyos.” paanyaya ni Archbishop Tirona.
Samantala, isinusulong naman ng alkalde ang online vaccine registration sa probinsya para sa mas mabilis at mas ligtas na pagpapatala upang makapagpabakuna.
Matatanggang natanggap ni Archbishop Tirona kasama ng may 349 na mga senior citizens sa Naga ang unang dose ng Sinovac vaccine laban sa COVID-19 noong ika-12 ng Mayo sa ilalim ng Anti Covid19 Vaccination Roll Out Program ng lokal na pamahalaan sa Naga City.
Una ng tiniyak ng Catholic Bishops’ Conference of the Philippines ang buong suporta ng Simbahang Katolika sa Anti Covid19 Vaccination Roll Out Program ng pamahalaan na naglalayong maprotektahan ang sarili at kapwa mula sa nakahahawa at nakamamatay na sakit.
