635 total reads
Naniniwala si Bontoc Lagawe Bishop Valentin Dimoc na mahalaga ang pagkain ng wasto at masusustansyang pagkain upang labanan ang anumang uri ng karamdaman kabilang na ang coronavirus disease.
Sa mensahe na ibinahagi ng obispo sa Radio Veritas, kinakailangan lamang ng tao na palakasin ang immune system upang makaiwas sa sakit. Sa pag-aaral ng mga eksperto, isa sa pinakadinadapuan ng COVID-19 ang mga taong mahina ang immune system.
“The most important thing to do now is to strengthen the immune system by eating healthy food and maintaining healthy lifestyles,” pahayag ni Bishop Dimoc sa Radio Veritas.
Sa kasalukuyang tala ng Mountain Province Provincial Health Office, umabot na sa 4,741 ang kabuuang kaso ng mga nahawaan ng COVID-19 sa lugar kabilang na ang 63 active cases.
Pagbabahagi ni Bishop Dimoc na bagamat walang bakuna noon, mataas ang naitatalang gumaling sa nakahahawang virus sa kanilang lugar na sa kasalukuyan nasa 4,596 o 96-porsyento sa total cases.
“Before the introduction ng vaccines, mataas ang recovery ng mga positive. Hence, the immune system can produce antibodies against COVID-19,” dagdag pa ng obispo.
Sinabi ni Bishop Dimoc na binibigyang prayoridad ng lokal na pamahalaan sa lugar ang pagbabakuna sa mga senior citizens at mga may comorbidities na higit na nangangailangan ng proteksyon laban sa virus.
Iginiit ng Obispo na higit na kinakailangan ang pag-iingat sa pangangatawan lalo na sa mga kinakain na magbibigay kalakasan sa kalusugan, sapagkat hindi sapat ang bakuna bilang pananggalang sa virus tulad ng pneumonia.
Sa kabila naman ng pagkakaroon ng bakuna, naitala ang mahigit 50-libong pagkasawi ng mga Filipino dahil sa naturang sakit noong 2018 ayon sa pag-aaral ng Statista Research.
Patuloy naman ang pagkilos ng simbahan sa pagpapalalim sa espiritwalidad at paghingi ng gabay sa Panginoon laban sa nararanasang krisis pangkalusugan dulot ng COVID-19.
