543 total reads
Inihayag ng opisyal ng Catholic Bishops’ Conference of the Philippines na dapat bigyan ng kaukulang pansin ang mga kabataan upang maiwasan ang stress ngayong umiiral ang coronavirus pandemic.
Ito ang mensahe ni Bayombong Bishop Jose Elmer Mangalinao, Chairman-elect ng CBCP-Episcopal Commission on Catechesis and Catholic Education para sa mga magulang dahil karamihan sa mga kabataan ngayon ang nakakaranas ng ‘stress from school’ dahil sa online classes sa gitna ng pandemya.
“Napakahalaga marahil na makausap talaga ng mga magulang ang kanilang mga anak kung ano ang kanilang nararamdaman sa panahong ito at kung ano ang kanilang mga palagay, ang iniisip,” bahagi ng pahayag ni Bishop Mangalinao sa panayam ng Radio Veritas.
Paliwanag ng Obispo na kaya maraming kabataan ang nakakaranas ng stress ngayong pandemya ay dahil masyado na itong nakatutok sa online classes at hindi na nila makahalubilo o makalaro ang mga kaibigan at kaklase, kumpara noong wala pang pandemya.
“One of the many ways for us to grow is to socialize, especially among friends. So, sa nakikita ko, talagang it makes stress dahil nananatili sila sa small space. And then there’s also they don’t see their friends… They can’t go anywhere or play the games they used to play, not only with one another among siblings, but with other young people,” ayon kay Bishop Mangalinao.
Batay sa ulat ng National Center for Mental Health, simula taong 2020 ay patuloy na ang pagtaas ng bilang ng mga kabataang tumatawag sa kanilang crisis hotline para sa mental health consultation na ang kadalasang dahilan ay ang stress na sanhi ng online classes.
Payo naman ni Bishop Mangalinao sa mga magulang na sikaping maglaan ng oras upang maiparamdam sa mga anak ang pagmamahal at pag-aalaga na higit na makatutulong upang maibsan ang nararanasang suliranin ngayong pandemya.
“Siguro ang solusyon ay dapat maging sensitibo ang mga magulang na sa ngayon ay busy’ng busy din sa pagtatrabaho… Mahalaga ‘yung trabaho para sa kanilang mga anak pero pag sinasabi nating nai-stress ang mga bata, siguro dapat nila itong bigyang pansin… Mahalaga rin dito ang time management sa mga bata,” saad ng Obispo.
Sa isinagawang Veritas Truth Survey noong Oktubre hanggang Nobyembre nang nakaraang taon, lumabas dito na negatibo ang epekto ng ‘online education’ sa mga mag-aaral mula elementarya hanggang kolehiyo sa buong bansa.
Samantala, ayon naman sa Department of Education magsisimula ang panibagong school year sa Setyembre 13, 2021, ngunit hindi pa rin pinahihintulutan ang face-to-face classes, maliban na lamang kapag ipinag-utos na ng Malacañang.
