731 total reads
Naglabas ng collegial statement ang Western Visayan and Romblon Bishops and Diocesan Administrator laban sa binabalak na pagtatayo ng casino sa Boracay Island.
Paksa ng naturang pahayag ang “No to Gambling Casino, No to Gambling in Boracay!” na hinihimok ang pamahalaan na huwag nang ituloy ang binabalak na pagtatayo ng casino sa isla at sa halip ay pakinggan ang panawagan ng mamamayan na panatilihing malinis at ligtas para sa tao ang Boracay.
“We appreciate the efforts of our government in restoring the natural, God-given wonders of Boracay Island that make it famous here and abroad. We appeal to our public servants to hear our people’s plea to keep Boracay clean, safe, child and family-friendly island to visit and to spend precious quality time with our loved ones,” ayon sa pahayag.
Nakasaad din dito na ang pagkakaroon ng lugar-sugalan sa Boracay ay magbubunsod lamang upang malihis ang kagustuhan ng mga turista na ituon ang pansin na makita ang tunay na kagandahan ng isla at mabigyang-daan ang mapaminsalang gawain na makakaapekto sa kaugalian, kultura at buhay ng mga nasa komunidad.
“Having the gambling casinos in Boracay will not only divert and distract visitors from the true beauty and value of this most cherished island but will also pave the way for destructive lifestyles and habits that will significantly alter and destroy the treasured values, culture and life of the community,” dagdag nito.
Sa mga nakalipas na taon, may ilang pagsusuri na ang pagsusugal ay nagdudulot ng pagkalulong na maaaring makaapekto, hindi lamang sa sarili, kundi sa pamilya at kapwa.
Naitala na higit sa 80-porsyento ng mga nalululong sa sugal ay dulot din ng alak at droga na nagreresulta rin sa paggawa ng krimen o kasalanan.
Kaya naman binibigyang-diin ng simbahang katolika na hindi ito tutol sa anumang uri ng pag-unlad ngunit dapat ito ay nakatutulong sa pagpapanatili at pagpapabuti ng lahat, partikular na sa tao at kalikasan.
“As Church, we are not against development but it should be a development that is both sustainable and integral, a development that is authentically just and for the common good,” saad ng pahayag.
Ngayong Oktubre 04, 2021, kasabay ng kapistahan ng patron ng kalikasan na si San Francisco ng Assisi, ang collegial statement na ito ay nilagdaan nina Jaro Archbishop Jose Romeo Lazo; San Jose de Antique Bishop Marvyn Maceda; Bacolod Bishop Patricio Buzon; San Carlos Bishop Gerardo Alminaza; at Kabankalan Bishop Louie Galbines.
Lumagda rin sa nasabing pahayag sina Capiz Diocesan Administrator Cyril Villareal; Kalibo Bishop Jose Corazon Tala-oc; at Romblon Bishop Narciso Abellana.
