499 total views
Pinuri ng opisyal ng Catholic Bishops’ Conference of the Philippines ang pakikiisa ni Quezon City Mayor Joy Belmonte sa iba pang alkalde ng National Capital Region sa panawagang ihinto ang quarrying operations sa Masungi Georeserve at Upper Marikina Watershed sa lalawigan ng Rizal.
Ayon kay Cubao Bishop Honesto Ongtioco, miyembro ng CBCP – Episcopal Commission on Social Action, Justice, and Peace, magandang hakbang ito ng mga opisyal ng Metro Manila dahil patunay ito na kanilang ang mga pangako na pangalagaan ang kapakanan ng kalikasan at mga kinasasakupan.
Nauna nang nagpahayag ng suporta sa panawagan sina Pasig City Mayor Vico Sotto, Marikina City Mayor Marcelino Teodoro, at Muntinlupa City Mayor Jaime Fresnedi.
“Maganda itong ginawa ng mga Mayor ng Metro Manila, especially kay Mayor Joy [Belmonte] dahil pinapakita nila na tinutupad nila ang kanilang mga pangako na paglingkuran hindi lamang ang mamamayan kundi pati ang inang kalikasan,” pahayag ni Bishop Ongtioco sa panayam ng Radio Veritas.
Sinabi ni Bishop Ongtioco na nararapat lamang na paigtingin ang panawagang ihinto ang anumang uri ng proyektong nakakasira sa kalikasan dahil tiyak na mas matinding panganib ang maaaring idulot nito sa malalapit na komunidad sakaling magkaroon ng mga sakuna.
“Hindi nakakatulong sa kalikasan ang pagbubungkal ng lupa at pagpuputol ng mga punongkahoy sa mga kabundukan dahil mas lalo lamang itong nakadaragdag sa suliranin natin sa climate change. Kapag lumala ito, mas magdurusa ang mga tao sa oras na dumating na ang mga kalamidad, kapag gumanti na si inang kalikasan,” ayon sa Obispo.
Panawagan naman ni Bishop Ongtioco na nawa’y mas paigtingin pa ng pamahalaan ang pagsusuri at pagbabawal na bigyan ng permiso ang mga malalaking kumpanya upang magsagawa ng ilegal na operasyon.
Dalangin din ng Obispo na dumami pa ang mga opisyal ng pamahalaan na tumulad sa mga naunang lumagda sa panawagan upang patuloy na itaguyod ang pagmamalasakit at pangangalaga sa ating nag-iisang tahanan.
Sa sama-samang panawagan ng mga opisyal, umaapela ang mga ito sa quarrying companies na muling suriin ang magiging epekto ng kanilang mga proyekto sa kalagayan ng mga tao at kalikasan, at kusang-loob na bawiin ang mineral production sharing agreements sa loob ng Upper Marikina River Basin Protected Landscape at Masungi Georeserve.
Nakasaad naman sa ensiklikal na Laudato Si’ ng Kanyang Kabanalan Francisco na tungkulin ng bawat mamamayan ang pangalagaan ang kalikasan laban sa pang-aabuso ng mga tao para na rin sa kapakinabangan ng susunod na henerasyon.
