726 total reads
Patuloy na nananawagan ang Diyosesis ng Legazpi laban sa pagsasagawa ng quarrying sa bahagi ng Mayon Volcano sa lalawigan ng Albay.
Ayon kay Bishop Joel Baylon matagal nang panawagan ng diyosesis sa pamahalaan ang pagpapatupad ng mahigpit na panuntunan para sa ligtas at maayos na quarrying upang hindi maulit ang mga nagdaang sakuna na kumitil sa buhay ng maraming residente ng Albay.
“We continue to call for more responsible quarrying activities in the slopes of Mayon Volcano in order to avoid any future disasters when heavy rains come especially during typhoons,” pahayag ni Bishop Baylon sa panayam ng Radio Veritas.
Magugunitang nanawagan na rin ang Obispo noong 2020 kaugnay sa quarrying kung saan kanyang iminungkahing isagawa na lamang ito sa gullies o mga kanal sa paligid ng Bulkang Mayon dahil ito ang likas na dinadaluyan ng tubig at lahar.
Paliwanag ni Bishop Baylon na hindi masama ang quarrying kung nasusunod lamang nang wasto ang mga mahahalagang panuntunan sa pagsasagawa nito.
“Hindi po masama ang pag-quarry, kasi kailangan natin ang mga aggregates para sa paggawa ng mga kalsada, bahay, at iba pa. Kaya lang dapat sa tamang lugar mag-quarry at hindi ‘yung kahit saan lang naisin ng nagku-quarry,” ayon kay Bishop Baylon.
Taong 2020 nang manalasa ang Super Typhoon Rolly at nag-iwan ng matinding pinsala kung saan nabaon sa pinaghalong lahar at malalaking bato mula sa Mayon Volcano ang nasa 300 tahanan sa bayan ng Guinobatan, Albay.
Kaugnay nito, patuloy din ang panawagan upang tuluyang mapahinto ang quarrying operation sa bahagi ng Masungi Georeserve at Upper Marikina Watershed sa Rizal.
Kabilang sa mga nagpahayag ng suporta at lumagda sa sama-samang panawagan ang mga alkalde ng National Capital Region na sina Quezon City Mayor Joy Belmonte, Pasig City Mayor Vico Sotto, Marikina City Mayor Marcelino Teodoro, at Muntinlupa City Mayor Jaime Fresnedi.
Mariing isinusulong ang pagpapatigil sa ilegal na gawain dahil sa pinsalang dulot nito sa kalikasan at buhay ng malalapit na komunidad na maaari pang lumala kapag dumating ang mga sakuna.
