747 total reads
Inaanyayahan ng Catholic Grandparents Association of the Philippines ang lahat na makibahagi sa 2nd Online National Conference for Grandparents and the Elderly sa ika-24 hanggang ika-26 ng Hulyo, 2022.
Ang nakatakdang gawain ay bahagi ng paggunita sa 2022 World Day for the Grandparents and the Elderly na may tema ngayong taon na “In old age they will still bear fruit”.
Ayon sa Kanyang Kabanalan Francisco, layon nitong higit na buksan ang kamalayan ng bawat isa sa kahalagahan ng mga nakatatanda sa lipunan.
Tampok sa nasabing three-day virtual conference ang pagbabahagi ng mga pagninilay sa kahalagahan ng mga lolo’t lola at mga nakatatanda sa pagpupunla ng pananampalatayang Kristiyano at kanilang papel na ginagampanan sa pamilya at sa lipunan.
Nakatakda ang World Day of Grandparents and the Elderly sa ika-24 ng Hulyo, 2022 na Kapistahan nina San Joaquin at Santa Ana ang Lolo at Lola ni Hesus na patron ng mga lolo, lola at nakatatanda.
Pangungunahan ni Catholic Bishops’ Conference of the Philippines (CBCP) President, Kalookan Bishop Pablo Virgilio David ang pagsisimula ng gawain habang kabilang naman sa mga magbabahagi ng kanilang mga pagninilay at pagsusuri sa kalagayan ng mga nakatatanda sa lipunan sina:
Day 1 – Ms. Emily N. Beridinco – Executive Director, Coalition of Services of the Elderly, Inc. (COSE)
Topic: Context and Situation of the elderly in the Philippines (A Call to Reflection)
Day 2 – Msgr. Manny Gabriel – Asst. National Chaplain, Christian Family Movement (CFM)
Topic: Grandparents and the elderly are a value and a gift both for sociaty and for ecclesial communities
Day 3 – Parañaque Bishop Jesse Mercado – Chairman, CBCP-Episcopal Commission on Family and Life
Topic: Wisdom and experience of the elderly in the context of the synodal journey of the Church (A call to Action)
Closing Remarks: Lipa Archbishop Gilbert Garcera – Founder, Catholic Grandparents Association of the Philippines.
Unang inilaan ng Santo Papa Francisco para sa mga matatanda na nagsisilbi bilang mga guro ng kabutihan sa lipunan ang kanyang pangunahing intensyon sa pananalangin sa buong buwan ng Hulyo.
Ayon kay Pope Francis, malaki ang ambag ng mga lolo, lola at mga nakatatanda sa buhay ng bawat isa kaya naaangkop lamang ang pagkilala at pagbibigay halaga sa kanila.
Paliwanag ni Pope Francis bahagi ng tungkulin ng kasalukuyang henerasyon ang imulat ang kamalayan ng mga kabataan sa pangangalaga sa mga nakatatanda na hindi ituring na pabigat sa halip ay mahalagang bahagi at sandigan ng buhay na nagtataglay ng mga karanasan at karunungan.
