515 total views
Iminungkahi ng Social Action Center ng Arkidiyosesis ng Tuguegarao sa pamahalaan ang paglikha ng food bank para maging imbakan ng mga natatanggap na relief goods tuwing panahon ng kalamidad.
Kaugnay ito sa libo-libong relief goods na napabayaan at nasayang para sa mga biktima ng Bagyong Ulysses nang manalasa sa Cagayan Valley region noong Nobyembre 2020.
Ayon kay Tuguegarao SAC Director Fr. Andy Semana, ito’y upang matutukang mabuti ang mga natatanggap na tulong at donasyon nang sa gayon ay wastong maipamahagi at mapakinabangan ng mga higit na nangangailangan.
“Magandang gumawa tayo ng center o food bank na takbuhan ng mga nangangailangan gaya nung Caritas Kindness Station na maraming natulungan lalo nitong nagdaang pandemya,” pahayag ni Fr. Semana sa panayam ng Radio Veritas.
Batay sa 2021 annual audit report ng Commission on Audit (COA) para sa Department of Social Welfare and Development (DSWD), lumabas na mula huling bahagi ng 2020 hanggang unang bahagi ng 2021 ay nakatanggap ang Field Office 2 ng DSWD sa Tuguegarao ng kabuuang bilang na 126,172 in-kind donations para sa mga biktima ng Bagyong Ulysses.
Ngunit, napag-alaman din sa inspeksyon na halos 22-libo ng mga donasyon ang hindi pa naipapamahagi noong Disyembre 31, 2021; at ang karamihan ay nabubulok na, expired, o napinsala na ng mga daga.
Sinabi naman ni Fr. Semana na mas makabubuting ipamahagi na lamang ang mga relief goods kahit walang sakuna upang hindi na muling masayang at sa halip ay mapapakinabangan pa lalo ng mga mahihirap na pamilya.
“Siguro tamang pamamahala lamang ang kailangan upang mapakinabangan natin nang tama ang mga resources natin. Kahit hindi panahon ng kalamidad, ibigay na lang natin ito sa mga higit na nangangailangan.”
Sa ulat ng National Disaster Risk Reduction and Management Council (NDRRMC), umabot sa humigit-kumulang 1.3 milyong pamilya ang lubhang naapektuhan ng pananalasa ng Bagyong Ulysses.
