543 total views
Ipinaalala ni Bayombong Bishop Jose Elmer Mangalinao ang malaking gampanin ng mga guro at kawani ng paaralan sa paghuhubog sa kaalaman ng mga mag-aaral.
Kinilala ni Bishop Mangalinao, chairman ng Catholic Bishops’ Conference of the Philippines – Episcopal Commission on Catechesis and Catholic Education ang pagiging masigasig ng mga guro upang mabigyan ng mabuting edukasyon ang mga estudyante sa dalawang taon ng pandemya.
Tiwala ang Obispo na ang mga guro na itinuturing na ikalawang magulang ng mga mag-aaral ang magsilbing gabay upang matagpuan ng mga mag-aaral ang kahalagahan ng edukasyon sa pagkakaroon ng maayos at magandang kinabukasan.
“Sila [mga guro] ay lubhang kinakailangan upang matutunan ng mga mag-aaral ang tama at malabanan ang kasinungalingan; maging bukas ang mga mag-aaral sa kasaysayan na huhubog sa ating kinabukasan at magpapatigil sa mga tsismis na pawang kasinungalingan,” pahayag ni Bishop Mangalinao sa panayam ng Radio Veritas.
Dalangin naman ni Bishop Mangalinao na ang pagbubukas ng panibagong taong pampaaralan ay magsilbing simula at hakbang tungo sa pagkakaroon ng modernong edukasyong makakatulong sa kaalaman ng mga kabataan.
Ito’y sapagkat patuloy na isinasaayos ng pamahalaan ang pagkakaroon nang maayos na kalidad ng edukasyon sa kabila ng krisis dulot ng COVID-19 pandemic.
“Higit nawa silang maging bukas sa panibagong pagkakataon na ibinibigay upang magturo, maggabay, at magbigay pananaw sa mga kabataan,” dagdag ni Bishop Mangalinao.
Magugunitang sa kasagsagan ng pandemya, nakita ang kakayahan ng teknolohiya upang patuloy na maipahatid sa mga estudyante ang edukasyon sa mga tahanan sa halip na pisikal na pumapasok sa paaralan.
Nakapaloob sa panuntunan ng Department of Education (DepEd) na sa pagsisimula ng klase sa Agosto 22 ay ipapatupad muna ang hybrid learning systems ng online classes, face-to-face classes, at modular learning systems hanggang Nobyembre 2.
Inaasahan namang sa Nobyembre ay maipatutupad na ang 100-porsiyentong face-to-face classes sa lahat ng pampubliko at pribadong paaralan sa bansa.
