1,040 total views
Umaasa ang pamunuan ng Diocesan Shrine and Parish of San Vicente Ferrer de Mamatid na magdulot ng malalim na pananampalataya ang pagdiriwang ng anibersaryo ng simbahan.
Ayon kay Fr. Gomer Torres, Rector at Parish Priest ng dambana, sinisikap nitong isabuhay ang layunin ng patron na ipadama ang diwa ng pag-ibig ng Panginoon sa sanlibutan.
Aniya, nawa’y paigtingin ng mananampalataya ang pagnanais na mapalapit sa Panginoon sa pamamagitan ng mga halimbawang ipinamamalas ni San Vicente Ferrer.
“Ang hamon ko lang sa mga parishioners ay mas palalimin pa rin ang kanilang pananampalataya, pagkilala at debosyon kay San Vicente Ferrer; ang talagang layunin naman ni San Vicente Ferrer ay hindi lamang iparamdam ang pagmamahal ng Diyos sa mga tao kundi akayin ang mga tao na magmahal din sa Diyos,” pahayag ni Fr. Torres sa panayam ng Radio Veritas.
Nitong October 28 ay ipinagdiwang ng dambana ang ika – 75 anibersaryo ng pagkakatatag kung saan pinangunahan ng Kanyang Kabunyian Manila Archbishop Jose Cardinal Advincula ang Misa pasasalamat.
Kasabay ng pagdiriwang ang opisyal na pagsara ng Jubilee Door ng parokya kung saan ayon kay Cardinal Advincula ay hudyat upang muling pag-alabin ng bawat isa ang sigasig ng paglilingkod.
“Ang pagsasara ng Jubilee Door ngayon ay hindi sumisimbolo ng pagwawakas ng pagdiriwang ng pagbibiyaya ng Diyos o ng ating misyon bagkus hinuhudyat nito ang pananabik sa muling pagbubukas sa susunod na hubileyo at ang angkop na pag-aantabay dito sa pamamagitan ng tapat na paglilingkod sa Diyos at sa kapwa,” ani Cardinal Advincula.
Samantala, sinabi ni Fr. Torres bagamat isinara ang Jubilee Door ng dambana ay mananatiling makatatanggap ng indulhensya ang mga dadalaw sa pandiyosesanong dambana ni San Vicente.
Binasbasan din sa pagdiriwang ang Garden of Peace ng parokya kung saan ilalagak ang urn ng abo ng mga yumaong kaanak.
Bukod kay Cardinal Advincula at Fr. Torres, dumalo rin sa pagtitipon si San Pablo Bishop Buenaventura Famadico, mga bisitang pari at daan-daang deboto ni San Vicente Ferrer.
Inaanyayahan ni Fr. Torres ang mananampalataya na dumalaw sa dambana at makiisa sa devotional masses tuwing Biyernes sa alas singko ng hapon at alas siyete ng gabi.
