551 total reads
Nanawagan ang simbahan at mga makakalikasang grupo sa Pamahalaang Panlalawigan ng Oriental Mindoro na pabilisin ang paglipat sa renewable energy kasunod ng mga hakbang sa pagtitipid ng enerhiya dahil sa pandaigdigang kakulangan sa langis.
Sa ilalim ng isang Executive Order, ipinatupad ng pamahalaang panlalawigan ang pansamantalang compressed workweek o mas maikling linggo ng trabaho sa mga kawani ng pamahalaan at iba pang hakbang sa pagtitipid ng enerhiya.
Ayon kay Fr. Edwin Gariguez, pinuno ng social action arm ng Apostolic Vicariate of Calapan at convenor ng Protect the Verde Island Passage Network, mahalagang hakbang ang pagtitipid ngunit kailangan ding tugunan ang mas malalim na suliranin sa enerhiya.
Batay sa mga ulat, maaaring tumaas ang halaga ng kuryente sa mga off-grid o lugar na hindi konektado sa pangunahing linya ng kuryente na umaasa sa diesel kung patuloy na tataas ang presyo ng langis.
“As long as island provinces depend heavily on imported fossil fuels for electricity, communities will remain vulnerable to global crises that are beyond our control,” pahayag ni Fr. Gariguez.
Noong 2023, idineklara ng pamahalaang pan lalawigan ang Oriental Mindoro bilang tagapagtaguyod ng malinis at renewable energy at inatasan ang pagbuo ng Provincial Power and Energy Council.
Ayon naman kay Atty. Avril De Torres, Deputy Executive Director ng Center for Energy, Ecology, and Development (CEED), matagal nang kinikilala ng lalawigan ang kahalagahan ng renewable energy, ngunit kailangan nang pabilisin ang pagpapatupad nito.
“What is needed now is to accelerate implementation so that communities can benefit from affordable, reliable, clean energy. Distributed systems like solar rooftops are, at this time, not just a strategic long-term endeavor, but an immediately deployable solution that can cushion the impacts of the crisis for communities in Mindoro and throughout the country,” ayon kay de Torres.
Dagdag naman ni Fr. Gariguez, makatutulong ang pagtalikod sa fossil fuels upang mapangalagaan ang Verde Island Passage, na may pinakamayamang marine biodiversity sa mundo, at kabuhayan ng mga pamayanan sa baybayin.
“Energy conservation is an important immediate step, but the long-term solution for Mindoro is a full transition toward renewable energy so that we provide electricity that becomes truly mura, maaasahan, at malinis for every Mindoreño,” dagdag pa ni Fr. Gariguez.
