8,256 total views
Nagpahayag ng pasasalamat ang Apostolic Vicariate of Puerto Princesa sa Palawan sa lahat ng mga Pilipinong patuloy na tumutulong sa mga biktima ng malakas na lindol sa Mindanao.
Ayon sa mensahe ng obispo, ang pakikiisa ng sambayanan ay mahalagang tugon sa pangangailangang dulot ng sakuna.
Inihayag ni Bishop Socarates Mesiona na ang tunay na pagkakawanggawa ay hindi nasusukat sa dami ng ating tinataglay, kundi sa kahandaang magbahagi kahit sa gitna ng kakulangan.
Ayon sa Obispo, ang mga donasyong ibinibigay ng taumbayan ay nagdadala ng pag-asa at ginhawa sa mga pamilyang nawalan ng tahanan at apektado ng lindol, habang patuloy ang panawagan ng simbahan para sa sama-samang pagtugon sa pangangailangan ng mga biktima.
Ayon sa mga katuruan ng Simbahang Katolika, katulad ng binibigyang-diin ni Pope Francis, ang habag at malasakit sa kapwa lalo na sa mga nagdurusa ay isang konkretong anyo ng pananampalataya na nagiging pamamagitan sa pagpaparating ng pagmamahal ng Diyos sa gitna ng sakuna at paghihirap.
Patuloy din ang pakikipag-ugnayan ng mga Diocesan Social Action Centers ng Catholic Bishop Conference of the Philippines, Archdiocese of Manila at ba pang Diyosesis sa Diocese of Marbel upang kagyat na maipadala ang tulong sa mga biktima ng malakas na 7.8 na Magnitude na Lindol sa Mindanao na pangunahing niyanig ang General Santos City.
