2,285 total reads
Tiniyak ng Archdiocese of Lipa na paiigtingin at palalawakin ang misyon ng National Shrine and Parish of Saint Padre Pio sa Sto. Tomas, Batangas, kasunod ng opisyal na deklarasyon bilang isang international shrine.
Ayon kay Lipa Archbishop Gilbert Garcera, pangulo ng Catholic Bishops’ Conference of the Philippines, patatatagin pa nito ang misyong pastoral, lalo na para sa mga may karamdaman, hindi lamang sa bansa kundi maging sa Asya at sa buong daigdig sapagkat batid nito ang malaking responsibilidad na kaakibat ng pagiging international shrine.
“This recognition of the Holy See is both a profound blessing and a solemn responsibility… The devotion will not just be exclusively for us Batangueño, but for the whole Philippines and for Asia,” ayon kay Archbishop Garcera.
Ginanap ang maringal na deklarasyon ng dambana bilang international shrine nitong September 23, kasabay ng kapistahan ni Padre Pio.
Binigyang-diin ni Archbishop Garcera na ang pagkilala ng Vatican ay nagpapatibay sa papel ng dambana bilang sentro ng pananalangin, misyon, ebanghelisasyon, at pilgrimage ng mga peregrino, hindi lang sa Pilipinas kundi maging sa mga dayuhang dumadalaw sa lugar.
Sinabi pa ng pinuno ng CBCP na ito rin ay patuloy na maging dambana para sa mga nangangailangan ng paghilom sa iba’t ibang nakararanas ng kawalan ng pag-asa bunsod ng mga hamong kinakaharap.
“At the core of this milestone is the shrine’s enduring commitment to the poor, to the sick, the marginalized… This sanctuary serves as a living haven of medical, physical, and spiritual healing,” giit ni Archbishop Garcera.
Ibinahagi ng arsobispo na bukod sa healing masses tuwing ika-23 ng buwan ay nagsasagawa rin ang dambana ng iba pang kawanggawa tulad ng medical, psychological, at legal assistance bilang bahagi ng holistic pastoral care.
Inihayag ng arsobispo na nakahanda na ang dambana na tanggapin ang malaking bilang ng mga deboto at peregrino na dadalaw sa international shrine kung saan noong 2023 kasabay ng paghahanda sa aplikasyon nito sa Vatican, ay pinalawak ang dambana hanggang sa 17 ektarya, at pinaigting ang kahusayan ng mga kawani at ministries upang tugunan ang mas malawak nitong pastoral na responsibilidad.
Samantala, sinabi naman ni Fr. Oscar Andal, rector at parish priest ng dambana, na hindi lamang mga imprastraktura ang inihahanda ng international shrine kundi higit sa lahat ang pagdiriwang ng mga Banal na Misa sa iba’t ibang wika, pagpapalawig ng oras ng Sakramento ng Kumpisal, at pagsasanay sa mga tauhan upang higit na mapabuti ang karanasan ng mga deboto at peregrino.
May 25, 2026 nang inilabas ng Dicastery for Evangelization ang decree na nag-apruba sa kahilingan ng arkidiyosesis na itaas sa international shrine ang dambana.
Kasabay ng deklarasyon bilang international shrine ay pinagtibay din nito ang ugnayan ng dambana sa Sanctuary of Saint Pio of Pietrelcina sa San Giovanni Rotondo, Italy, kung saan nakahimlay ang santo.
Ang Shrine of Saint Padre Pio sa Batangas ang ikalawang international shrine sa Pilipinas kasunod ng Shrine of Our Lady of Peace and Good Voyage o Antipolo Cathedral na unang nadeklara noong 2023.
