749 total views
Hiniling ng bagong Auxiliary Bishop ng Archdiocese of Cebu sa mananampalataya lalo na sa Arkidiyosesis ang patuloy na panalangin sa kanyang bagong misyon na kakaharapin.
Sa panayam ng Radio Veritas kay Bishop Ruben Labajo, sinabi nitong makatutulong ang panalangin at pakikiisa ng mananampalataya sa kanyang paglalakbay tungo sa mas maunlad na simbahan at pamayanan.
Naniniwala ang obispo na sa pagkakaisa at pagtutulungan ay mapagtagumpayan ang anumang hamon at mas lumago ang pananampalataya sa mga komunidad.
“Akong hangyo nga i-ampo ko sa akong bag-ong misyon isip abag nga obispo diri sa Cebu. Magmalampuson kita sa atong misyon kung magtinabangay ta. Uban sa pangaliya sa Mahal nga Birhen ug sa tabang pod nila Archbishop Palma, Bishop Dodong ug mga pari dinhi sa archdiocese magkahiusa ta sa panon sa atong pagtoo. [Hiling ko sainyo na ipagdasal ako para sa aking panibagong misyon bilang katuwang na obispo dito sa Cebu. Magtatagumpay ang ating misyon kung magtulungan tayo. Sa tulong ng panalangin ng Mahal na Birhen sa tulong din nila Archbishop (Jose) Palma, Bishop (Midyphil) Billones at sa mga pari ng Archdiocese, sama-sama at magbuklod tayo sa ating paglalakbay], ” pahayag ni Bishop Labajo sa Radio Veritas.
Kilala ang bagong katuwang na obispo ng Cebu sa pagkakawanggawa at pagtataguyod ng mga programa sa mga mahihirap na komunidad at pagiging aktibo sa charismatic groups.
Sa homiliya ni Malolos Bishop Dennis Villarojo, pinaalalahan nito ang bagong obispo na maging daluyan ng pagpapala at maghatid ng kapayapaan sa mga pamayanan.
“Today, Bishop Ruben, the Lord is sending you. He is sending you as lamb among wolves. But perhaps by bridging the ruptures, you can reconcile lamb and wolf together. He asks you to bring peace to every home you visit, but perhaps you could also announce justice without which there could be no peace,” ani Bishop Villarojo.
Pinangunahan ni Cebu Archbishop Jose Palma ang Episcopal ordination bilang principal consecrator habang nagsilbing Co consecrator naman si Papal Nuncio to the Philippines Archbishop Charles Brown at Bishop Villarojo.
June 23, 2022 nang italaga ni Pope Francis si Bishop Labajo na Auxiliary Bishop ng Cebu kasama si Bishop Midyphil Billones.
Bukod sa dalawang katuwang na obispo ni Archbishop Palma, dalawa rin ang Auxiliary Bishop Emeritus ng arkidiyosesis na sina Bishop Emilio Bataclan at Bishop Antonio Ranola.
Ginanap ang pagdiriwang sa Cebu Metropolitan Cathedral na sinaksihan ng humigit kumulang 40 mga obispo, daang daang mga pari, relihiyoso at layko mula sa iba’t-ibang parokya ng Archdiocese.
